Arsenal an chak awlsam

Mikel Arteta hoa transfer bazar-a thawm nei na tak Arsenal-in pre-season duhawm an hman an chhunzawm zel a, nimin khan Major League Soccer club Orlando City chu 3-1 in an hneh.

Exploria Stadium, Orlando-a inkhelah Arsenal tan Gabriel Martinelli chuan goal hmahruai a khung a, mahse, MLS club tan Uruguay international Facundo Torres chuan si phurh hi a sut.

Mahse, Gunners tan Eddie Nketiah leh Reiss Nelson te chuan goal khat ve ve an khung ve leh a, Orlando lamin a chhanletna tur an neih loh avangin Arsenal hi 3-1 in an chak.

Arsenal inkhel hi an defender thar tur Oleksandr Zinchenko chuan a hmunah a en a, mahse, an inkhelh lai hian official-a an la inlakluh loh avangin Arsenal tan a inlan thei lo.

Gunners tan City aṭanga an lakluh thar tho Gabriel Jesus chu bench aṭanga luhtir a ni a, AC Milan fan-te lung tileng turin Alexandre Pato chu Orlando tan hian a inlan bawk.

Arsenal hian Pathianni zinga Chelsea an hmachhawn leh hunah USA-a an pre-season tour chu an khar ang a, England-ah kirin, July 30 tlaiah Emirates Cup chu Sevilla nen an khel ang.

London club hian August 5 zanah season thara an league match hmasa ber an khel dawn a, khualmualah Crystal Palace an lenchilh dawn a ni.