Djokovic-a'n US Open khel thei dawn lo

US Open buatsaihtu chuan tournament kalphung tur an ti chhuak a, an kalphung ang chuan Novak Djokovic a inlan thei dawn lo. United States sorkarin kalphung an thlak a nih erawh chuan kawng a la inhawng ve thei bawk.

Tun dinhmunah chuan, ram dang mi US lut tur tan chuan hripui leng laka invenna lak ngei a ngai. Djokovic hi vaccine la duh lotu a ni a, kumin tir lam khan Australian Open pawh a khelh theih loh phah tawh.

US Open chuan thuchhuah siamin, "Grand Slam Rule Book kan hmang dawn, hemi aṭang chuan tournament neih hma world ranking thar bera player 42 chuan main draw an khel thei nghal dawn.

"Player tumah a hrana duhsak leh ngaihsak bik an awm dawn lo, keini chuan US sorkar thupek leh inkaihhruaina kan zawm dawn. Ram pawn mi rawn zin lut tur chungchangah pawh sorkar thu kan zawm ang," an ti.

Tournament hi August 29 aṭangin New York khawpuiah khelh a ni dawn. Tunah chuan inelna hmachhawn tur zingah Djokovic hi telh a ni, a duh a nih chuan Covid-19 vaccine lak theihna hun a la nei, mahni thu duh ve tawk tak hian vaccine a lak erawh a rinawm loh.

Wimbledon title a lak khan Djokovic-a'n Grand Slam nomawi 21 a nei tling chiah a, amah aia champion hnem chu vawi 22 champion tawh Rafael Nadal chauh a ni - tun season chhung chuan Spanish star hi a umphak hman dawn ta lo a ni.

Kum 35 mi Djokovic hian tun hmain US Open nomawi vawi thum a chawi tawh, hard court inelna lian hi hmachhawn leh tur chuan a rei lo berah pawh kum khat a nghah leh phawt a ngai dawn tihna a ni.