Messi-a'n goal a khung

Japan-a pre-season tour nei mek Paris Saint-Germain chuan Nilaini zan khan 2-1 in Kawasaki Frontale an hneh a, Lionel Messi chuan French club tan goal a khung.

Messi hian minute 32-na lekah goal hmahruai a khung a, PSG rawlthar beiseiawm Arnaud Kalimuendo chuan second half-ah an goal hnihna a khung ve bawk.

Kum 20 mi Kalimuendo hian season hmasa kha Lens-ah loan-in hun a hmang a, inelna hrang hrangah match 35 khelin goal 13 a khung.

Japanese champion tan Kazuya Yamamura chuan minute 84-naah goal a khung ve a, mahse, hun tawp thlenga goal dang lut tawh loin PSG an chak.

French club manager thar Christophe Galtier chuan inkhelah hian Messi, Neymar leh Kylian Mbappé te chu bul a ṭantir a, Japan National Stadium-a inkhel entu mipui 65,000 ten an hun tawn hlimawm an hre reng tawh ang.

PSG hian an pre-season match hmasa berah Quevilly-Rouen chu 2-0 in France-ah an lo hneh tawh a, Kawasaki Frontale an hneh hi Japan tour-a an match hmasa ber a ni.

Ligue 1 champion hian Urawa Red Diamonds (July 23) leh Gamba Osaka (July 25) te chu pre-season tour-ah an la hmachhawn dawn a, July 31 zanah Nantes nen Trophée des Champions nomawi inchuhin Tel Aviv-ah season bul an ṭan ang.

PSG hian an league match hmasa ber chu August 6 zanah an khel dawn a, khualmualah Clermont Foot an lenchilh dawn a ni.