Juve defender thar Gleison Bremer

Juventus chuan Matthijs de Ligt an hralh aṭanga rei lote hnuah Gleison Bremer an lalut. Torino defender hi pound maktaduai 34.8-in an lei a, kum 2027 June thla thleng daih contract an ziahpui.

Kum 25 mi Bremer hian Torino tan season duhawm a hmang, tun dinhmunah chuan Serie A defender zinga khawng leh ṭha berte zinga mi a ni, season nga chhung atana inremna an nei thei hi Old Lady tan lawmna tur a ni ang.

Brazilian club Atletico Mineiro aṭangin 2018 khan Torino hi a zawm a, inelna hrang hrangah match 110 a khelhsak hman. Season hmasa khan league match 38 an khelh zingah vawi 33 zet bul a ṭan - 2021-22 season Serie A defender ṭha ber atan an thlang hial.

Season hmasa khan an khingpuite ball in pe kaltluang lai vawi 105 a tihtawpsak a, European league lian panga zinga record nei ṭha ber a ni. 6ft 2in a sang niin ball kangah a ṭha bawk - Juve chauh ni loin club lian dang pawhin an ngaihven a ni.