Chelsea result-ah Tuchel a lawm lo

USA-a pre-season tour nei mek Chelsea chuan nimin khan MLS club Charlotte FC chu penalty-ah an ngam lo a, friendly match mai mah ni se an chak zawh loh avangin Thomas Tuchel a lawm lo hle.

Bank of America Stadium-a inkhelah hian Chelsea tan Christian Pulisic chuan goal hmahruai a khung a, mahse, hun pek belh minute hnihnaah Mexican striker Daniel Ríos chuan Charlotte tan si phurh a sut.

Team pahnih an inhnehtawk avangin penalty hmanga chak zawk zawn zui a ni a, Chelsea tan Crystal Palace-a a loan hmanna aṭanga lo kir Conor Gallagher chuan a pet goal lo - US club lamin an khung vek thung a, 5-3 in an chak.

Chelsea boss Tuchel chuan, "Second half-ah khan kan theihna pholang turin darkar chanve zet hun kan mamawh a, hun kan nei ta cheng a, minute 10 vel bak kan che thei lo a, kan khel ṭha tawk lo.

"Kan goal nawr a na lo a, kan kalphung a dik lo a, chak duhin kan tuihal lo a, engmah kha a ṭha tawk lo. Hetiang ang kan nih reng chuan tun hi vawi khat hrem kan tawrhna a ni dawn lo," a ti.

Tuchel hian a duhtawk mai lo. German coach chuan, "Keini aiin an huai zawk a, second half-ah khan a mala kan inhmachhawnin kan talbuai a, kan chet tam tawk loh vang a ni.

"Ball kan chanin kan ti ṭha tawk lo a, ball nena kan movement a fuh tawk lo a, second half-ah kha chuan kan inchai tawk viau - chu chu kan duh dan a ni lo," a ti a, awlsam taka chakna turah an chak loah a ngai.

Chelsea inkhel hi club neitu thar zinga mi Todd Boehly leh Behdad Eghbali ten a hmunah an en a, London club tan hian nipui transfer-a an lakluh Raheem Sterling chuan a match hmasa ber a khel.

Hetihlai hian Napoli aṭanga lakluh centre back Kalidou Koulibaly erawh a la inlan lo - Chelsea hian Pathianni zing dar 5:30-ah Arsenal nen friendly match an khel leh ang a, he inkhelah hian USA-a an tour chu zoin, July 29 zanah Udinese nen Italy-ah an inkhel leh ang. London club hian an pre-season match hmasa berah Club America chu 2-1 in an hneh tawh.

Chelsea hi Sevilla centre back Jules Kounde lalut turin La Liga club nen an inrem tawh nia sawi a ni bawk a, he thuziak i chhiar meuh chuan an inrem tawh hial mai thei.

August 6, zan dar 10:00-ah Blues hian an league match hmasa ber an khel dawn a, an legend Frank Lampard-a enkawl Everton chu khualmualah an lenchilh ang.

Chelsea first half:
Mendy; James, Thiago Silva, Emerson; Hudson-Odoi, Jorginho, Kovacic, Alonso; Ziyech, Batshuayi, Pulisic

Chelsea second half: Mendy; Chalobah, Colwill, Sarr; Kenedy, Ampadu, Gallagher, Chilwell; Sterling, Havertz, Mount