Forest an bazar nasa; an ti mai mai lo!

Premier League kai thar Nottingham Forest-in English top flight league-ah a tikimtu mai nih an tum lo a, nipui transfer-ah thawm nei ring ber pawl an ni mek.

Forest hian Hudders-field Town midfielder Lewis O'Brien leh defender Harry Toffolo te chu an lalut leh tawh a, Championship club player pahnih manah hian pound maktaduai 10 an inseng.

Nottingham Forest hian nipui transfer-ah ringawt player 10 an lalut tawh a, Liverpool, Manchester United leh Bayern Munich aṭangtea player an lakluh nawk avangin an bazar-na pawh a namai lo tih a lang.

Manchester City la champion ve lohna European Cup-a vawi hnih champion tawh Forest hian Manchester United chhuahsantu Jesse Lingard an dawr mek bawk.

A thar pahnih
Nilaini zana Forest lak thar pahnih hi an hming a langsar lem lo a, mahse, Championship playoff final-a Huddersfield an hneh ṭum khan player pahnih hian Forest an hmachhawn a, coach Steve Cooper-a hriatchian pahnih an ni.

Kum 23 mi O'Brien hian Bradford City-ah loan-in a lo khel tawh tih loh chu club dang a la nei lo a, season hmasa khan inelna hrang hrangah match 50 khelin goal thum a khung a, assist vawi thum a nei.

Midfielder O’Brien contract rei zawng hi Forest chuan, "Hun rei tak chhung atan," ti zawngin an puang a, kum nga tal chu ni tura ngaih a ni.

Kum 26 mi Toffolo hi defender niin, season hmasa khan match 48 khelin goal ruk a khung a, assist vawi riat a nei bawk - Norwich City aṭanga inzir chhuak defender hi a contract rei zawng tarlan a ni lo.

Bundesliga lam
Forest-in Bundesliga lam an hawi a, German top division aṭang hian player lakluh pathum an nei tawh - pound maktaduai 17 man Taiwo Awoniyi hian season hmasa khan Union Berlin tan match 43-ah goal 20 a khung.

Kum 26 mi Moussa Niakhaté chu Mainz 05 aṭangin an lalut a, 6ft 3in-a sang centre back hian Mainz tan season nga chhungin match 135 a khel a, goal kua a khung - top flight league-a tawnhriat nei ṭha a nihna hi a hlu dawn.

Pound maktaduai sarih chuang man Omar Richards hi Bayern Munich aṭanga an lak a ni a, season hmasa khan German champion tan match 17 a khel - Bundesliga leh DFL Super Cup nomawi a chawi a, Premier League a huphurh lo ang.

Forest hian Costa Rican midfielder Brandon Aguilera an la bawk a, ani erawh kum 19 mi niin Alajuelense-ah loan-in tun season chu a khel leh phawt dawn.

English player
League-a che ṭha tura pawimawh tak chu a ram mi player neih a ni - Forest hian hei hi an hrechiang. Manchester United aṭangin goalkeeper Dean Henderson chu season khat chhung atan loan-in an hawh tawh a, ṭhatpui tham keeper a ni.

Bayern aṭanga an lak full back Omar Richards pawh English player a ni a, Liverpool aṭanga an lak right back Neco Williams leh Burnley aṭanga an lakluh Wayne Hennessey te pawh Wales mi ni mah se English football-a tawnhriat nei ṭha an nih avangin an ṭangkai ang.

Kum 21 mi Neco hian Liverpool tan match 33 a khel hman a, season hmasa chawhnu lam kha Fulham-ah loan-a khelin Premier League an inpetkai nan a ṭangkai takzet bawk - Reds rawlthar beiseiawm ṭhin hian Premier League leh FIFA Club World Cup thlenga champion nomawi a chawi tawh avangin champion awmzia hial hre phak a ni.

Burnley aṭanga lakluh keeper Hennessey hi kum 35 mi a ni tawh a, Burnley mai bakah Wolverhampton Wanderers leh Crystal Palace tana Premier League match lo khel nual tawh a ni a, ram tan match 104 a khelh tawh bawk avangin dressing room tan a ṭangkai dawn - Henderson thachhang a dawl ang.

Lingard beiseina
Forest hian Manches-ter United-a a contract hmang zo Jesse Lingard an hnimhnai tawh viau bawk - he thuziak i chhiar meuh chuan an inlalut fel tawh hial mai thei.

Lingard hi Everton, Leicester City, Tottenham Hotspur leh Newcastle United pawhin lakluh an duh a, mahse, Forest hian kar khatah £180,000 (Rs. 1,71,43,897.54) hlawhtir an inhuam avangin an dinhmun a ṭha hle.

Nipui transfer-a an lakluh zinga mi Giulian Biancone pawh hi kum 22 mi chauh a la ni a, AS Monaco aṭanga inzir chhuakin, Belgian club Cercle Brugge leh Ligue 1 club Troyes tana khel tawh a nih avangin tawnhriat a nei ṭha tawk.

Championship mawngphah aṭanga Premier League hruai thlengtu Steve Cooper-a'n Forest hi a kaihruai dawn bawk a, season thar an inkhel tur en a châkawm tawh - August 6-ah Newcastle United lenchilhin an match hmasa ber an khel ang.