Osaka leh a coach an inṭhen

Hmeichhe tennis world number 1 hlui Naomi Osaka leh a coach Wim Fissette te chuan Nilaini zan khan an inṭhen tih an puang, anni pahnih hi 2019 aṭanga thawk dun tawh kha niin hetih hun chhung hian Grand Slam title an la hman.

Osaka hian Fissette kaihhruaina hnuaiah 2020 khan US Open nomawi a chawi, Belgian coach nen bawk hian a hnuah Australian Open title an la zui leh bawk, a hnu lamah erawh khelmual chhung bakah pawn lamah harsatna neuh neuh an nei.

Fissette chuan, "Naomi nen 2019 aṭanga kan thil tawn dunte kha ropui ka ti hle, ka theihnghilh tawh ngai lo ang. Hmasawnna tam tak hmuh tur a awm a, tennis khelh dan bakah nunphung thlengin a puitling chak hle.

"Player naupang zawk tak tak hnenah chona leh phurna a siamsak a, amah vanga tennis ngaina pawh an tam tih ka hria. Ani nena zinkawng kan inṭawm thei hi ka lawm," tiin a sawi a, a player chu ṭawngkam ṭha takin a thlah.

World number 1 hlui Osaka hian rilru lamah harsatna a nei tawh a, a harsatna hi paltlang tawh mah se tun hma lama tennis a khelh ang khan a la khel chhuak thei rih lo, ngaiawh leh tur chuan hun a la duh deuh mai thei. Tun dinhmunah world number 40 a ni mek.

Tun hmain Fissette hian player langsar tak tak a lo thawhpui tawh, chung zingah chuan Victoria Azarenka, Kim Clijsters leh Simona Halep te pawh an tel a ni - anni pathum pawh hi an vanglai chuan world number 1 ni thei vek an ni.