Harden leh 76ers an inrem

James Harden leh Philadelphia 76ers te chu kum hnih chhung atan an inrem. Inremna tharah hian Harden-a'n kum khat chhunga a hlawh tur chu dollar maktaduai 14.5 zetin a tlahniam dawn.

Kum hnih chhunga inremna hi dollar maktaduai 68 hu a ni a, season tharah hian maktaduai 33 a hlawh phawt ang, a dawt leh season-ah chuan maktaduai 35 a hlawh tling dawn a ni.

Kum 2018 NBA Most Valuable Player hi tun hnai season hnih chhung chu malpui hliamin a tibuai, hei vang hian basketball court-ah hun a hmang tam tawk lo, season hmasa laihawl khan Brooklyn Nets aṭangin player inthleng kualnaah 76ers hi a lo pan tawh a ni.

All Star zinga vawi 10 zet tel tawh Harden chuan, "Season duhawm leh ṭha tak hman ka duh a, chumi tur chuan beiseina pawh ka nei. Sixers ṭantute lawmna siam hi ka thil tum leh duhthusam chu a ni," tiin a sawi a, a hma aia ṭha zawkin khelh ngei a tum.

Sixers hian free agent pahnih PJ Tucker leh Danuel House te an lalut tawh bawk. Anni pahnih hi Harden-a'n Houston Rockets tana a lo khelhpui tawh kha an ni a, inhre ṭha leh inman sa an nih avangin an hmuhnawm dawn.

Harden chuan, "Nipui chawlh kan hman dan hi a ṭhain lawmna tur zel a ni, tunah chuan season tharah ṭha taka kan khelh theih nan kan thawhrim a ngai dawn, hnathawh hun a inṭan," a ti.