Tun aia ṭha zawk kan nih a ngai - Lampard

Everton manager Frank Lampard chuan a naute chu hmasawn turin a duh a, player-te chu tun aia ṭha zawk nih tum turin a fuih. Amah ngei pawhin a thlen chin aṭanga hmasawn a ngaih thu a sawi ve bawk.

Lampard-a enkawl Everton hi season hmasa khan Premier League-ah an inhamtang hram, season tharah English football inelna sang ber hi an khel chhunzawm dawn, tunah hian United States-ah pre season tour neiin an awm.

Nimin zing khan Minnesota United nen friendly match an khel a, 4-0 tehmeuhin an mualpho. Premier League club tan goal li chhuah hi mualphona a tling a, goal khung theih loh pawh zahna tham a tling.

Lampard chuan, "Ka naute hian season hmasa Premier League-a kan dinhmun kha hre reng se ka duh, tlak hlau taka bei hram hram kan ni tih kha theihnghilh a thiang lo ang, chuvangin hmasawn tumin kan beih a ngai dawn.

"Crystal Palace hneh chunga EPL-a kan inhamtangte kha a ropui, a hnu lamah pawh ropui chhunzawm kan tum tur a ni ang. Thil tum mumal tak kan nei tur a ni a, thlen chin aṭanga hma kan sawn ṭheuh a ngai," tiin a sawi.

Major League Soccer club Minnesota United an ngam loh hma hian Arsenal lakah 2-0 in an lo tlawm tawh bawk, match hnih an khelh tawh chinah goal an la khung miah lo, anmahni lamah goal ruk a lut thung.

Everton hian season thar inbuatsaih nan Blackpool an la lenchilh dawn a, chumi hnuah Ukrainian club Dynamo Kyiv an mikhual leh bawk ang. Premier League an match hmasa ber atan August 6 hian Chelsea an tum dawn.

Lampard chuan sawi zawmin, "Ngaihtuah ngai tam tak a awm, hnathawh tur leh thawh hmabak pawh kan ngah hle. Tun hnai kar hnih leh a chanve chhunga kan hnathawh hian khelmual chhungah rah ṭha a la chhuah lo.

"Khelmual chhunga rah ṭha chhuah tur chuan player tinin mawhphurhna an nei a, mimal tin inkar boruak a ṭhat a ngai bawk, thawhhona ṭha lehzual zawk kan mamawh," tiin hmasawn an mamawh thu uar takin a sawi.

Tun nipui bazar chhungin Everton hian an hmatawng ṭha Richarlison chu Tottenham lakah an chân. Burnley tana contract hmang zotu defender James Tarkowski chu man nei loin an lalut thung.