FA Cup Final-ah Arsenal vs Chelsea

Thawnthu hlui keu let chuan Millennium Stadium, Cardiff-ah Arsenal leh Chelsea ten 2002 FA Cup final an khel a, Gunners legend Tony Adams tan player a nih laia a match hnuhnung ber a ni. Adams hian a team chu si hnih faia hnehna chan puiin nomawi a chawi. Khatih hun laia rawlthar duhawm John Terry chu substitute bench aṭanga tlanlutin final boruak temtir ve a ni.

Zanin dar 10:00 hian Wembley Stadium-ah Arsenal leh Chelsea ten FA Cup final vawi 136-na an khel dawn a, Blues legend Terry-a'n a club hmangaih jersey a hak hnuhnun ber ṭum a ni dawn. Kum 36-a upa Terry tan player a nih hun chhunga a match hnuhnung ber a ni thei bawk.

Inthlak thleng
FA Cup final-a an intawn hmasak hunlai hi chuan Chelsea tan Arsenal hi elphak loh ang hial ngaih an ni, Wenger-a naute hian 2003-04 season-ah hneh loh neih loin league-ah an champion theih bawk avangin Premier League team ṭha bera ngaih an ni hial.

Mahse, Gunners hian "Invin­cible team" an din hnuah beisei an phak leh tawh lo. League-ah an champion zui tawh lo a, FA Cup-ah vawi thum an champion belh leh tih bak tun hnai kum 13 chhungin chhuan tur an nei lo hle.

Hetihlai hian Chelsea erawh siam danglamin an awm. Kum 2003 nipui laiin Chelsea-ah hmel danglam kan hmu, a hming chu Roman Abramovich a ni. Russian sumdawng hausa hian a sum leh pai hmangin Blues hi a siam lian chho ta a ni.

Tun hnai kum 15 chhungin Chel­sea hian Premier League nomawi panga bakah Cup chi hrang pakua an chawi a, Champions League-ah an champion bakah Europe-a club lian zingah an inhlangkai thei hial.

Tunlai boruak
Premier League-a pangana Arsenal hian tlarhnungah buaina an tawk mek, Laurent Koscielny chu hrem a ni a, Gabriel Paulista a inhliam bakah Shkodran Mustafi dinhmun a chiang lo. Defence laia chhawr tlak an neih chu kum 21-a upa Rob Holding leh tun season-a minute 37 chiah la inkhel Per Mertesacker te an ni.

Wenger-a'n a enkawl hnua a vawi khat nan Arsenal hian season tharah Champions League an khel dawn lo, kum khat bak contract nei tawh lo Alexis Sanchez leh Mesut Ozil te tan an match hnuhnung ber a ni thei. Sanchez leh Ozil te hi contract duhawm zawk zawrh mek an ni a, an la pawm lo - FA Cup final zawhah chuan a chiang har lo ang.

Premier League champion hlim Antonio Conte tan khelmuala lut tur player thlan kawngah harsatna a awm lo ang. Chelsea hian player inhliam langsar an nei rih lo. David Luiz leh Gary Cahill te awm mah se veteran defender Terry-a hmel kan hmu ngeiin a rinawm, England captain hlui hian inkhel bul a ṭan lo a nih pawhin Blues jersey ha chunga a match hnuhnung ber khel turin khelmual chhungah a luh ngei beisei a ni.

Chelsea hian season tluanin tlarhmaah Diego Costa an chhawr a tih theih, Spain international hian league match 35 a khelh aṭangin goal 20 a khung. Ani bakah hian Michy Batshuayi an la nei bawk, kum 23-a upa striker hian an match hnuhnung pathumah goal li a khung a, West Brom laka goal awmchhun khungtu niin league champion an nihna nemnghettu a ni.

Wenger a ropui
Kum 67-a upa Wenger-a'n Arsenal a enkawl chinah FA Cup nomawi vawi ruk a chawi tawh a, zaninah hian a naute a hlawhtlinpui leh a nih chuan Liverpool leh Chelsea te club record nihrualin vawi sarih a champion dawn a ni.

Arsenal manager Wenger chuan, "Ka tan match hnuhnung ber a ni dawn lo, a chhan chu thil eng pawh thleng se football-ah ka la cham chhunzawm dawn a ni. Ka tan ni loin he club tan hian nomawi chawi ka duh a, chumi tur chuan kan theihna zawng zawng kan hmang ang," tiin a sawi, a hma hun sawi chiang lo mah se Wenger hian chawlh a la tum lo tih erawh a pha lo.

Arsenal hi an chak a nih chuan Manchester United nen record inṭawm an neih FA Cup champion hnem ber (12 titles) kalsanin record thar an siam dawn a, tun hnai kum li chhungin khawvela knock out tournament upa berah hian vawi thum an champion-na chiah a ni bawk ang.

Manager tam zawk tan Premier League-a pangana nih leh FA Cup final luh hi a chhe lo a, mahse Wenger tan erawh season duhawm lo a ni. Amah bang tura nawr tute boruak sang lutuk tur thawi dam nan chuan Blues hneh hi a pawimawh hle a ni.

Hei le Conte
Italian manager Conte-a'n Chelsea a enkawl hnua Arsenal a hmachhawn hmasak ber chu nikum September thla kha a ni a, 3-0 in an tlawm. Juventus manager hlui hian Emirates Stadium-a a mualphona hi insiamṭhat nan a hmang a, hnunglam a hawi tawh lo.

February thla khan Stam­ford Bridge-ah Gunners hi 3-1 in an hneh let thei a, league match 38 an khelh aṭanga vawi 30 hnehna changin season khat chhunga league-a hnehna chang hnem thei ber record an siam!

Carlo Ancelotti kaihhruaina hnuaiah 2009-10 season khan Blues hian league leh FA Cup champion an ni kawp tawh a, tunah nomawi lian pahnih chawi kawp theihna hun ṭha an nei leh mek - kum 47-a upa Conte hian Arsenal hnehna nomawi a chawi zui thei a nih ngat chuan season khat chhunga a hnathawh hi kumkhuaa sawi a ni tawh ang.

Chelsea boss Conte chuan, "League champion kan ni thei a, a ropui hle. FA Cup-ah kan hlawhtling zui leh a nih chuan hna kan thawk ṭha chungchuang hleah a ngaih theih ang. Kan inkhel turah hian rinkai zawk kan awm lo, keini chuan nomawi pahnih kan chawi theih nan huaisen takin kan bei ang," tiin a sawi.