Barcelona boss tur Ernesto Valverde?

Athletic Bilbao chuan an coach Ernesto Valverde-a'n a chhuahsan thu an puang a, Barcelona player hlui hian Catalan club a zawm dawn nia sawi thawm a awm nghal.

Season tharah Luis Enrique-a'n Barcelona a enkawl tawh dawn lo a, Barcelona president Josep Maria Bartomeu chuan May 29-ah Enrique thlaktu tur hi an puan tur thu a sawi. Bartomeu-a'n he thu a puan hnu lawkah hian Valverde-a'n Bilbao a chhuahsan thu hi a chiang ve leh ta bawk si a, Catalan club nena sawizawm an ni nghal hi a awm lo hran lo.

Valverde erawhin a hmalam hun a sawi duh lo a, "Min duhtu club awm ve bawk mah se tun dinhmunah chuan eng club ta mah ka ni lo a, ka kalna tur lam ka la sawi thei lo," a ti.

Kum 53-a upa manager hian Espanyol chu 2006-07 khan UEFA Cup-ah final a lo luhpui tawh a, Greek Super League-ah Olympiakos chu vawui thum champion puiin Greek Cup-ah vawi hnih nomawi a chawi bawk. Spanish manager hian 2015 Spanish Super Cup-ah Bilbao hi a lo champion pui tawh bawk a, final-ah Barcelona chu 5-1 in an sawp a ni.