Michael Jordan khumtu LeBron James

LeBron James chu NBA playoff chanchina point score hnem ber a ni ta. Cleveland Cavaliers star James hian Boston Celtics lakah point 35 a score a, playoff-a point a score tawh zawng zawng chu 5,995 niin Michael Jordan-a record (5,987 points) a khum ta a ni.

Nimin zing khan TD Garden-ah NBA Eastern Conference Finals Game 5 khelh a ni a, Cavs hian 135-102 a hnehna changin series 4-1 in an la - Golden State Warriors nen NBA champion nih tumin June 2 zing dar 6:30-ah an intawng ang.

American star James hian kum 2011 leh 2014 inkar khan Miami Heat chu NBA champion vawi hnih a nih pui a, nikum khan Cleveland chu hlawhtlin pui lehin kuminah a zawna a vawi sarih nan NBA Finals a khel dawn a ni.

Kum 32-a upa James chuan, "Jersey number 23 ka hak chhan chu Mike-a'n a hak ṭhin vang a ni, ani vang khan basketball hi ka ngaina a, kan naupan lai kha chuan Michael Jordan kha pathian ang maiin kan ngaisang," a ti.

Forward James hian record siam tur hian match 212 a khel a, hetih lai hian Jordan erawhin match 179 bak a khel lo. Jordan hian NBA nomawi vawi ruk a chawi a, James hian kuminah a champion leh a nih chuan a vawi lina tur a ni ang - nikum khan chak lo tur a an lan tawh hnuah ropui takin Golden State an lehthal thei a ni.