City an inthianfai

Premier League pa-thumna Manchester City-in inthen fai hna an thawk ṭan a, Etihad Stadium-a an contract hmang zo tawh tur goalkeeper Willy Caballero, winger Jesus Navas leh full back pahnih Gael Clichy leh Bacary Sagna-te chu contract thar zawrh loin an chhuahtir dawn.

Kum 35-a upa Caballero hian kum 2014 khan Malaga aṭangin City hi a zawm a, City siban lamah thachhang dawltu atan ber hman a ni. Kum 31-a upa Navas hian City-ah kum li hun a hmang tawh a, Manchester khaw club hian Spanish club Sevilla aṭangin pound maktaduai 14.9-in kum 2013 khan an lalut a ni.

Clichy leh Sagna te hian Arsenal aṭangin City hi an pan ve ve a, kum 31-a upa Clichy hi kum 2012-a City-in an Premier League nomawi hmasa ber an chawi khan City player a ni tawh a, 2011 khan Arsenal aṭangin Arab sum hmanga siam len club hi a zawm.

Kum 34-a upa Sagna hian 2014 khan Arsenal aṭangin City hi a zawm ve bawk. Player pali zingah Navas-a'n City a chhuahsan fel der tawh a, Caballero, Sagna leh Clichy ten June-a an contract a zawh hunah Manchester club hi an chhuahsan ve leh ang.