CYMA Football a hmuhnawm chho zel

27th May, 2017

CYMA leh MFA ṭangkawpin an buatsaih TṬ Royte Trophy - Inter Branch YMA Football Tournament-ah nimin khan Zawlnuam Borai, Lengpui, Ramhlun South leh Republic Vengthlang ten an khingpui hnehin last 16 an lut.

Vawiin hian CYMA Football hmuh tur a awm dawn lo. May 30, Thawhlehni khian last 16 khelh chhunzawm leh chauh tur a ni a, inkhel hi nimin aṭang khan Zonet chuan Zawlbukah live-in a pechhuak a ni.

Zawlnuam an ṭha

Aizawl khaw pawn pahnih inkhelah Zawlnuam Borai-in Samlumkhai chungah an leng tih lantirin 5-0 in hnehna an chang.

Zawlnuam-in minute riatna leka R. Lalchhanhima hmanga hma an hruai avangin last 16 kalkawng a awlsam sawt a, minute 76-naah MS Dawngzela'n goal khung belh-in chak tur zawk a chiang. Hemi hnu hian Zaithanmawia'n goal khat a khung belh bakah Lalbiaknunga'n goal hnih a khung.

Electric Veng vanduai

Champion tura rinkai zinga mi Electric Vengin minute 8-na lekah Aizawl FC forward Jonathan Lalrawngbawla hmangin hma an hruai a, amaherawhchu an khingpui Lengpui an nih miau avangin chakna tham a tling lo.

Lengpui pawhin AFC tana khel an kawl a, forward F. Lalremsanga'n penalty hlah mah se veteran midfielder Rohmingthanga luh hnuah inkhel an thunun lehzual a, injury time-ah Vanlalhruaitluanga hmangin goal an sual chhuak.

Penalty Shootout vawi nga petah Lengpui-in ṭum hnih an hlah a, Electric Vengin an hun ṭha neih hmang ṭangkai loin vawi hnih tho an hlah. Sudden death-ah Lengpuiin Mizoram Police midfielder V. Lalṭanpuia penalty hlah hmang ṭangkai thei lo mah se Lalbiakhlua hlah vanga an hun ṭha neih erawh an bawhpelh tawh lo.

Ramhlun S nge nge

Ramhlun South-in an ṭhenawm Ramthar Veng lakah minute thumna lekah hma an hruai a, team ṭha lo zawka ngaih an beidawng lo. Ramthar hian Stephen Lalnunmawia hmangin minute 25-naah an sut a, second half-ah player ṭha zawk an danglam.

Ramhlun South tan Vanlal-thlamuana'n minute 69-naah goal hnihna a khung a, veteran midfielder Samson Ramengmawia'n injury time-ah goal thumna a khung leh bawk.

Goal nga luhna!

Inkhel hnuhnung berah Khawzawl Joint YMA leh Republic Vengthlang an inkhel a, goal nga luhna inkhel hi a hmuhnawm.

Aizawl khaw pawn team hian Vanlallawma hmangin minute thumna lekah hma hruai mah se RVT-in H. Lalhlimpuia hmangin minute 17-naah an sut. Team pahnih inhnehtawk mah se MPL5 best goalkeeper MS Dawngzela'n minute 42-naah RVT midfielder Malsawma a tihtluk avangin hnawhchhuah a ni a, penalty area pawn chiah a nih avang erawhin a vannei thung.

Khawzawl player Rammuana'n an lamah minute 55-naah tilut a, player 10-in khel tawh mah se talbuai loin T. Lalnunpuia hmangin minute 75-naah an sut. Republic Vengthlangin MPL5 best midfielder Lalruatfela Zote minute 82-naah an luhtir a, Fela Zote hian a luh aṭanga minute ngana lekah chakna goal a khung a, 3-2 in hnehna an chang.

Last 16 lut tawh (8)
ITI Veng, Leitan, Chatlang, Aizawl Venglai, Zawlnuam Borai, Lengpui, Ramhlun South, Republic Vengthlang
Round of 32 - LAMMUAL
Nimin Inkhel Results
Zawlnuam Borai 5 - 0 Samlukhai
ZAW : R.Lalchhanhima 8'; M.S.Dawngzela 76'; Zaithanmawia 80'; Lalbiaknunga 83', 86'
Lengpui 1 - 1 Electric Veng
LEN : Vanlalhruaitluanga 90+1'
ELE : Jonathan Lalrawngbawla 8'
Penalty shootout-ah Lengpui 4-3 in an chak
Ramhlun South 3 - 1 Ramthar Veng
RAS : Lalnunmawia 12'; Vanlalthlamuana 69'; Samson Ramengmawia 90+1'
RAM : Stephen Lalnunmawia 25'
Khawzawl Jt YMA 2 - 3 Republic Vengthlang
KHA : Vanlallawma 3'; T. Lalnunpuia 75'
REP : H. Lalhlimpuia 17'; Rammuana 55' (OG); Lalruatfela Zote 87'
May 30, Thawhlehni
09:30 AM West Phaileng Jt YMA Vs Chanmari
11:30 AM Republic Veng Vs Ramhlun North
01:30 PM Hualngohmun Vs Khatla
03:30 PM Ramhlun Vengthar Vs Chhinga Veng
May 31, Nilaini
09:30 AM Khawlailung Vs Salem Veng
11:30 AM Kelsih Vs Bawngkawn
01:30 PM Durtlang Vs Luangmual
03:30 PM College Veng Vs Kawnpui Vengthar