Indian Super League khel tur a la chiang lo
Football Sports Development Limited (FSDL) chuan season thar atana Indian Super League khel tur chu niminah tih chian a nih tur thu sawi mah se June-a puan turin sawn a ni leh ta - Indian football-ah 'thil chiang' a awm hleithei lo.
ISL buaipuitu FSDL-in tun thla tir khan ISL-ah hmun ruak pathum a awm thu an puang a, khawpui 10 thlang chhuakin Ahmedabad, Bengaluru, Cuttack, Durgapur, Hyderabad, Jam-shedpur, Kolkata, Ranchi, Siliguri leh Thiruvananthapuram behchhan tur club tan dilna thehluh theih a ni a, May 25 aia tlai loa thehlut tura tih an ni.
Dilna thehluttu
I League club Bengaluru FC, East Bengal leh Mohun Bagan ten ISL-a khelh tumin dilna form an la chhuak a, mah se heng club lian pathum zingah hian Bengaluru chauh chu May 25-a dilna thehlut hman an ni.
Tata Group-in Jamshedpur khawpui behchhanin dilna an thehlut ve bawk a, Techno Group chuan dilna an la chhuak ve nia sawi ni mah se May 25 hmain dilna an thehlut hman bik lo - Vanglaini-in thu a dawn danin Techno hi Kolkata club hlun Mohammedan Sporting behchhan a ni.
Kolkata club an tlai
East Bengal leh Mohun Bagan-in inngaihtuah nan hun an duh rei a, ISL khelh dil tur tana lakchhuah ngai 'Invitation To Bid' (ITB) document pawh lakchhuah theih a nih thu puan a nih aṭanga kar khat hnu velah chauh an la chhuak.
Kolkata club lian pahnih hotuten AIFF general secretary Kushal Das dawrin dilna thehluh theih hun chhung hi pawtsei turin an ngen a, mah se May 12-a ITB lakchhuah theih a nih thu puangtu FSDL-in an pawhsei phah lo.
Engtin zel?
Indian football ngainatuten nghakhlel taka May 26 an thlir laiin Ningani tlai khan Bengaluru leh Tata Group chiahin dilna an thehlut hman tih a chiang tawh a, AIFF lam chuan June 7-ah ISL khel tur hi an tihchian chauh tur thu nimin khan an puang ve leh nghal bawk.
Nilaini khan AIFF president Praful Patel leh general secretary Kushal Das-ten Asian Football Confederation (AFC) general secretary Dato Windsor chu AIFF hmunpui Football House-ah titi puina an nei a, Indian football hma hun chu June 7-ah sawi ho leh turin an ti.
Chutichuan...
June 7-a Indian football hma hun sawina tur hi Malaysia khawpuia Kuala Lumpur-a AFC Headquarters-ah a ni a, he hunah hian FIFA competition department hotu, India sorkar hnuaia Ministry of Youth Affairs and Sports hotu, I-League, Indian Super League, IMG-Reliance leh Football Players' Association of India (FPAI) aiawhte tel tura beisei an ni.
Kuala Lumpur khawpuia meeting-ah hian thupui ber tur chu I League leh Indian Super League chungchang a ni dawn a, heivang hian nimina ISL khelh tur puan tur pawh hi sawn a nih phah - East Bengal leh Mohun Bagan-in dilna thehlut hman lo mah se June 7-a meeting tur hi an vanneih pui lo ang tih a sawi theih loh.