Garry Monk-a'n Leeds a chhuahsan

Garry Monk chuan Leeds United manager a nihna aṭanga a ban thu a puang a, Swansea City boss hlui hian a ban chhan hi Leeds neitu Andrea Radri­zzani nen an inrem theih loh vang a nih thu a sawi.

Italian sumdawng hausa Radrizzani-a'n Nilaini khan Leeds Uni­ted-ah neitu pumhlum nihna a nei a, a hna hmasa tur chu Gary Monk hnena contract thar zawrh a nih thu a sawi. Mahse, kum 38-a upa manager nen hian an inrem thei ta si lo a, Monk a chhuak.

Leeds-a enkawl chhunga league match 46-a vawi 22 hnehna chang thei Monk chuan, "Leeds United-a ka hun hman chu a tawp ta. He club-ah hian kum tam zawk hun hmang turin ka inbeisei a, mah se club neitu thar nen indawrna kan neih hnuah kan inrem thei ta si lo a ni," tiin a ban chhan a sawi.

Hetihlai hian Leeds pawhin thuchhuah an siam ve nghal a, "Garry-a thutlukna avanga kan hnual em em rualin keini chuan he club aia lian zawk hi a awm kan rem ti lo a ni," tiin an inṭhen chhan an sawi ve bawk.