FA Cup champion Arsenal

Arsenal chu FA Cup inelna bika team hlawh­tling ber an ni ta. Arsene Wenger leh a naute hian Inrinni zan khan Chelsea 2-1 a hnehin a vawi 13 nan khawvela knock out tournament upa ber nomawi an chawi.

Kum 67-a upa Wenger-a'n Arsenal a enkawl chhungin FA Cup nomawi vawi sarih a chawi ta a, Liverpool leh Chelsea ten FA Cup an chawi zat nen a intluk. Manager malah French pa thluak ṭha aia champion hnem an awm lo - tun hnai kum li chhungin vawi thum a champion-na chiah a ni bawk. North London club hian Manchester United nen record intluk an neih (12 titles) chu an khum ta a ni.

Sanchez-a goal
Wembley Stadium-a inkhelah Alexis Sanchez chuan ṭan aṭanga minute lina lekah goal hmahruai a khung. Sanchez-a goal khung dawnah hian offside position-a awm Aaron Ramsey hmufuhtu assistant referee chuan flag a phar, mah se referee Anthony Taylor-a'n assistant referee a sawi pui hnuah goal-ah pawm a ni.

Chelsea lam hi Ramsey awmna hmun avangin an lawm lo a, goal khungtu Sanchez-a kutin ball a per bawk avangin an sawisel nasa hle.

Minute 68-naah Victor Moses chu box chhungah penalty beiseiin a tlu der a, referee Taylor-a'n Blues wing back hi a phu ang ngeiin yellow card pahnihna pein a hnawt chhuak.

Arsenal-in goal venhim an tum luat­ah player 10-a khel chungin Premier League champion tan Diego Costa chuan minute 76-naah an siphurh a sut. Kum 2010-a an tih ang bawkin Chelsea-in season khata nomawi pahnih chawi beisei hman mah se Blues lawm chhung a rei lo - goal an khung aṭanga minute thum a liam hnu lekah Ramsey-a'n chakna goal a tauh lut.

A hunah Mertesacker
Defender rinrawl Laurent Koscielny hrem a ni a, Shkodran Mustafi a inhliam bawk. Per Mertesacker chuan kum khat leh thla khat hnuah Gunners tan inkhel bul a ṭan. Germany international hlui hi rawlthar Rob Holding nen tlarhnung laiah inkawpin Arsenal-in nomawi an chawi theih nana ban rinawm a ni.

Arsenal hian nomawi an duh zia lantir nan a tir aṭangin inkhel an thunun, first half-ah chauh pawh Danny Welbeck leh Ramsey ten woodwork an tih per bakah Chelsea captain Gary Cahill-a'n an goal-a lut tur chu line aṭangin vawi hnih ball a pet chhuak hman hram. Mesut Ozil-a'n a thiam thil hmangin Blues tlarhnung a chhaih mangang fo a, Gunners midfielder hian ball siam thiam mah se goal hmaah erawh a huaisen tawk lo.

Wenger-a nauten minute 90 chhungin chak zawk nih phu khawpin an khel ṭha zawk a, tun hnaia sawisel hlawh French manager hian nomawi liam tham chawi turin theihna a nei tih a lanchhuah tir chiang hle a ni.

Wenger In?
Arsenal manager Wenger chuan, "Minute khatna aṭanga tawp thleng khan kan khel ṭha hle a ni. Ka nauten inpumkhat taka noimawi an sual chhuak thei khan min ti lawm takzet," tiin a sawi. Wenger hian Gunners-a enkawl hnuah Invincibles team a din thei leh FA Cup vawi sarih a champion ta chu chhuanawm a tih thu a sawi tel bawk.

Kum 67-a upa Wenger chuan a hmalam hun sawiin, "Kan medal dawn hi chu zan duhawm hriat reng nan ka dah ṭha ang. Ka awm dan zel tur erawh kan la nghah a ṭul a ni. Thawhlehni khian board meeting a awm ang a, Nilaini emaw Ningani emawah chuan engkim a chiang ang," tiin nomawi chawi zanah a la sawi chiang duh lo.

Blues an chuai
Italian manager Antonio Conte-a'n Chelsea a enkawl ṭan kumah league nomawi chawi nghal mah se FA Cup erawh an chan. Arsenal player-te ball inpe kual rang tak tak karah midfielder pawimawh Eden Hazard leh N'Golo Kante te an che thei lo. Moses hnawhchhuah a nih hnuah goal khung mah se tho chhuak turin an nawr chhunzawm thei lo - Cahill leh David Luiz zarah goal dang an chhuah belh lo chu an vannei hle.

Chelsea manager Conte chuan, "A tir lam minute 25 chhung kha chu kan tan a mangan thlak hle. A bul ṭan ṭha lo zawk ni mah ila second half-ah kan insiam ṭha a, player kim loa kan khelh hnuah thil a harsa zual ta a ni," a ti.

Conte chuan sawi chhunzawmin, "Season hmasa a 10-na ni chungin kuminah bul kan ṭan a, ka naute hian tun season-ah hian an theihna zawng zawng sengin an khelh avangin league nomawi pawh kan chawi, an lakah vuina tur ka nei lo. Season tharah chuan team ṭha zawk leh theihna sang zawk nen kan inlan theih ngei ka beisei," a ti.