City-ah Bernardo Silva a lut

Manchester City-in season thar atan an transfer bazar an ṭan leh der tawh a, Monaco attacking midfielder Bernardo Silva chu pound maktaduai 43-in an lalut. Portuguese midfielder man zat hi pound maktaduai 60 thlenga sang chho thei tur niin khawthlang media-te chuan an tarlang.

Kum 22-a upa midfielder chuan, "Khawvela team ṭha ber pawlah ka tel ve ta. Pep Guardiola enkawlna hnuaia khelhna remchang i nei a nih chuan hnar a harsa a, ani hi khawvela coach ṭha ber a nih loh pawhin a ṭha ber pawla mi chu a nichiang a ni," a ti.

July 1-a City squad zawm tur Silva hian Etihad Stadium-ah kum nga cham turin contract a ziak nia tarlan a ni. Tun season-a Ligue 1 champion leh Champions League semifinalist Monaco tan player pawimawh pawl a ni a, inelna hrang hrangah match 58 khelh sakin goal 11 a khung a, assist 12 ngawt a nei bawk.

Portugal tana vawi 12 inlan tawh Bernardo hi Benfica youth system chhuak a ni a, August 2014 khan Monaco hi kum khat chhung loan-a cham turin a pan a, January 2015-ah contract nghet ziahpui a. Hetih hunlaia Bernardo man zat hi pound makta­duai 13 bawr vel a ni. Kum hnih a liam leh meuh chuan pound maktaduai 30 velin a man a to belh tawh!

Manchester City-in Premier League-ah pathumna nichungin season an khar a, player lakluh tuma an hel mek zingah Tottenham Hotspur defender Kyle Walker hming a ri ring leh tawh hle.