Nomawi nen Enrique-a'n Barcelona a mangṭha
Luis Enrique-a'n Barcelona tana a match hnuhnung berah nomawi a chawi - Inrinni zan khan Copa del Rey final khelh a ni a, Catalan club-in nomawi chawi loa season mangṭha duh loin Deportivo Alaves chu 3-1 in an sawp.
Kum 47-a upa Enrique-a'n Barcelona-ah kum thum a hman chhunga nomawi pakua a chawihna chiah a ni a, season thum chhungin Spanish Cup chawi loa season hman a nei miah lo - inchhuanna tham a ni.
Messi = goal
Vicente Calderon-a inkhelah Ibai Gomez-a'n Alaves tan post a pet per dawp hnuah Barca an harh zawk a, Lionel Messi chuan minute 30-naah goal khungin Catalan club hi hma a hruaipui. Season hmasa second division champion Alaves an hnual duh bik lo, Theo Hernandez hmangin minute thum hnu lawkah an si phurh an sut.
Mahse, 'Barca nge nge' tih turin Enrique-a naute an khelh chhunzawm - Neymar-a'n minute 45-naah hnai set sawt aṭangin hmahruaina goal a khung nawn a, Messi-a'n Paco Alcacer khung tura ball fing zet a siamsak chu Alaves tlarhnung tan dan theih a ni lo.
Barca = record
Catalan club-in champion nomawi an chawi zanah record hmuh tur a awm nual. Messi-a'n tun season-a a goal 54-na a khung chiah khan kum 1950-a Athletic Bilbao striker Telmo Zarra hnua Copa final vawi lia goal khung thei hmasa ber dinhmun a luah a, Neymar-a'n goal a khung khan kum 1960- 62 inkara Real Madrid legend Ferenc Puskas hnua Copa final-a season thum chhung a zawna goal khung thei hmasa ber a ni bawk.
Barca tana chanchin lawmawm lo erawh minute 11-na leka hliam vanga Javier Mascherano lakchhuah a ngai kha a ni. Argentine defender hi Marcos Llorente nen ball an inchuhna lamah a luah leh khupah hliam a tuar a, a dinhmun hi chiang taka sawi theih a la ni lo.
Mangṭha Enrique
Enrique-a'n Barca-ah season thum hun a hman chhungin La Liga (2), Copa del Rey (3), Spanish Super Cup (1), Champions League (1), UEFA Super Cup (1) leh FIFA Club World Cup (1) nomawi a chawi a, hlawhtling takin Nou Camp a mangṭha ta.
Barcelona aṭanga inkhelh chawlhsantu coach chuan, "Barca fan-te tan nomawi chawi chunga an lawmna ka thlen ṭhin avangin ka hlim em em a, vawiinah hian inchhuang tak chungin he club hi ka thlah dawn a ni. Ka hmaa nomawi inchhawp 13 aṭangin pakua ka chawi a, ka ti ṭha thawkhatin ka hria," a ti a, Barca a mangṭha danah a hlim hle.