MFA a lawm

Mizoram Football Association chuan 2016-2017 season ṭha taka an hman zawh theih avangin Pathian hnenah lawmthu an sawi a, Mizoram foot­ball tana hnathawktu zawng zawngte chungah lawmthu a sawi a, Mizoram sorkar chungah thinlung takin lawmthu a sawi bawk.

Mizoram chhunga football thuneitu sang ber MFA hian May 26, Inrinni khan Annual General Body Meeting an nei a, season tluana an hlawhtlinnate an lawm bawk.

Season thar

Kum 2017-2018 sea­son chhungin MFA chuan theihtawp chhuah chhun­zawm zel a tum a, MFA Cup, MFA Super Cup, Inde­pendence Day Foot­ball, Mizoram Premier Lea­gue, Inter District Compe­tition, Grassroots & Youth Development-te hi kalpui chhunzawm zel tum a ni.

Hmasawnna thar

MFA chuan season thar­ah Futsal, Women's Foot­ball, Coach Education leh Referees Development-ah chak zawka ke pen a tum.

Mizoram chhunga football thuneitu sang ber hian ruahmanna eng emaw zat a nei tawh a, AIFF nen ṭangkawpin thui tak kal tumin a inbuatsaih mek. Futsal League changtlung tak leh intihsiakna a tam thei ang, hmeichhe inelna mumal tak leh registration pawh awmze nei zawk, AIFF leh Asian Football Confederation hriatpui coaching course, AIFF Referee Development Course-te kalpui turin ruahmanna a siam.

AIFF rawtna kum nau­pang zawk tana football league kalphung thar pawh ngaihtuah tur zingah a dah tel bawk.

Transfer hun

June leh October hi transfer hun atan MFA chuan a rel tawh a, June-ah hian MFA leh DFA registration kalpui ṭan tur a ni ang.

June-ah Super Cup

MFA Super Cup chu June thla chawhnu lamah Aizawlah ṭan hman tum a ni a, hetah hian MFA/DFA/Zone FA hnuaia inziak lut eng club pawh a tel theih a ni. MFA chuan MFA Super Cup 2017-a khel turin Mizoram chhunga foot­ball club zawng zawng inel­na hmachhawn turin a sawm.

Sorkar chungah a lawm

MFA chuan kawng eng­kima hma a sawn theihna tura khelmual ṭha siamsak a, puih a ngaihna apianga puia phurpuitu Mizoram sorkar chungah lawmthu sawiin chief minister Lal Thanhawla leh sports minister Zodintluanga te chungah lawmthu a sawi.

Season thar lo awm turah sorkar puihna a ma­mawh zel dawn avângin MFA chuan Mizoram sor­kar chu pui chhunzawm zel turin a ngen nghal bawk a ni.