Dortmund hun a thleng ta
Borussia Dortmund-in 2011-12 season-a Bundesliga leh DFB Pokal an champion kawp hnua a vawi khat nan nomawi lian tham an chawi leh ta. Thomas Tuchel hoten hian Inrinni zan khan Eintracht Frankfurt chu 2-1 in an hneh.
Olympiastadion Berlin-a inkhelah Dormund-in minute riatna leka Ousmane Dembele khung hmangin hma an hruai a, amaherawhchu Frankfurt-in Ante Rabic hmangin minute 29-naah an si phurh an sut bakah Haris Seferovic-a'n goal ban a pet per bawk.
German international Marco Reus inhliam vanga lut Christian Pulisic-a'n penalty a hlawh chhuak a, Pierre-Emerick Aubameyang-a'n chakna goal khung nan a hmang. Gabonese forward hian tun season-ah goal 40 a khungna chiah a ni a, season tharah chhuah a dil nia sawi awmin Manchester City, Manchester United leh Paris St-Germain te nen sawi zawm a ni.
German Cup final hnuhnung pathumah Dortmund hian final lut vek mah se Bayern Munich laka ṭum hnih an chak loh avang leh Wolfsburg an hneh loh bawk avangin BVB tan nomawi chawi chunga season an khar hi chanchin lawmawm a ni.
Dortmund hi league-ah pathumna an nih avangin Champions League khel turin an tling tawh a, DFB Pokal an chawi avangin paruknaa awm Hertha Berlin-in season tharah Europa League group stage an thleng nghal. League-a pasarihnaa awm Freiburg-in EL third qualifying round an khel thung ang.
Borussia Dortmund manager Thomas Tuchel chuan, "Kan khelh ṭhat ṭum a ni lo a, amaherawhchu kan duh ber hnehna kan chan avangin kan hlawhtling," tiin a sawi.