Scottish Cup champion Celtic

Celtic-in Scotland-ah ngamtu an tawng lo - Scottish Cup final-ah Aberdeen 2-1 in an hneh a, domestic treble chawi chungin season an khar. Inrinni zana inkhelah hian Aberdeen tan Jonny Hayes-a'n goal hmahruai khung mah se Celtic tan Stuart Armstrong chuan an si phurh a sut a, hun pek belhah Tom Rogic chuan chakna goal a khung bawk.

Brendan Rodgers-a naute hian tualchhung inelnaah tlawm hmel an hmu miah lo - League Cup, Scottish Premiership leh Scottish Cup an chawi. Tlawm hmel hmu lo chunga Scotland-a season khar thei hmasa ber an ni.

Celtic tan kum 2013 hnua Scottish Cup nomawi an chawi lehna hmasa ber a ni a, domestic treble an chawi vawi lina niin kum 2001 hnua hetiang dinhmuna an din leh hmasa ber a ni bawk.

Aberdeen tan erawh Celtic hi 'hmelma' an ni - league-ah Rodgers-a naute hi phak loin pahnihna an ni a, League Cup leh Scottish Cup final-ah an hneh lo ve ve bawk!

Celtic manager Rodgers chuan, "A ropui thlawt a, hei aia ṭha zawka he thawnthu ziah dan hi ka hre chuang lo. Celtic ṭan chunga seilian ka ni a, he club enkawl ringawt pawh hi ka tan chuan chawimawina a ni tawh. Ka player leh fan-te ka lawmpui a, he hlawhtlinna hi an phu a ni," tiin a sawi.