Mourinho hoin Spurs an tlang

Tottenham Hotspur chuan FA Cup last 16 lut turin Southampton chu 3-2 in an ngam a, Jose Mourinho naute hian Norwich City chu fifth round-ah an tawng ang. 

London khawpuia inkhelah hian Spurs-in hnehna chang turin minute 87-naa Son Heung-min-a penalty an mamawh a, 2-2 a an inhnehtawk reng hnuah 3-2 in an chak. 

Spurs-in hnehna an chan avangin kum 2008 hnua a vawi khat nana major trophy chawi beiseina a la nei nung zel tihna a ni a, FA Cup bakah Champions League-ah last 16 an lut tawh. 

Premier League-ah pangana ni mek mah se Mourinho hoin Champions League khelh beiseina an nei thar leh mek a, duhawm lo taka season bul ṭantu Spurs tan kawl a êng ṭan.

Mourinho-a'n FA Cup a ngai pawimawh tih lantirin a squad neih ṭhat theih ang ber a rem a, inhliam Giovani lo Celso leh Erik Lamela bakah FA Cup khel thei lo Steven Bergwijn chu player langsar zinga hman loh an ni. 

Hliam tenau nei Dele Alli pawh bench-ah dah ni mah se minute 61-naah luhtir a ni. Spurs-in an duh ang ngeiin minute 12-naah goal hmahruai an khung a, own goal a ni. 

Tanguy Ndombele-a shot chu out tura a lan laiin Saints defender Jack Stephens chuan a lo tawk fuh a, goalkeeper Angus Gunn chuan ball kal dan a chhut sual avangin a goal. 

Mahse, Saints hian first half-ah an si phurh an sut lehnghal a, Nathan Redmond-a shot chu Spurs keeper Hugo Lloris chuan dang perin Shane Long-a ke bulah tak a tla a, April 2019 hnua a vawi khat nan Long hian khualmualah goal khungin si phurh a sut. 

Saints-in si phurh an sut hnu lawkah vanduaina an tawk a, midfielder James Ward-Prowse chu a khup hliam vangin zawnchhuah a ngai. Mahse, second half-ah mikhual team zawkin goal an khung a, striker form em em mai Danny Ings chuan an goal hnihna a khung. 

Mahse, Saints hlim chhung a rei lo. Lucas Moura chuan minute ruk hnu lawkah si phurh a rawn sut a, hun tawp nan minute thum chauh a awm tawh tihah chakna goal an khung zui. 

Bench aṭanga luhtir Alli chuan Son tan ṭha zetin a siamsak a, South Korean forward hi duhthlan tur dang nei lo Gunn chuan a ti tlu a, penalty a chawi. Son-a'n goal-ah a chantir a, Spurs an chak. 

Spurs-in an goal hmasa zawk an chhuah danah Lloris chuan mawh phur mah se French keeper hi an insiamṭha vat a, hnai set sawt aṭanga Jannik Vestergaard-a ball tauh a dan chu an chak chhan zinga chhiar tel tlak a ni. 

Southampton-in 57% ball an chang a, vawi 15 shot an neih zinga vawi sarih chu target-ah a kal - Spurs erawhin vawi kua chiah shot an nei a, target-a an shot neih pathum a goal thung!

Mourinho chuan, "Ka ngaihdan ang taka ka sawi dawn a nih chuan team khel ṭha zawk an chak lo. Mahse, chak duhna thinlung nei lian zawk kan chak a, kan theihna zawng zawng kan hlan a ni," a ti. 

Spurs centre back Jan Vertonghen chu second half-ah thlak a ni a, kum 32 mi defender hian manager hmaah a lungawi lohna lantir lo mah se a hmelah a lungawi lo tih a lang thung. 

Mou chuan, "A hnunga player panga awm khan game kan thunun lo a, chuvang chuan lakchhuah a ngai a ni. Player tam tak chuan an lungawi lohna an lantir chiam ṭhin a, Jan erawh professional a nih ang takin  awm a ni," tiin a defender a fak.