Mittui nen Totti kan thlah ta

"A tawp tak tak ta. 'A tawk ta e' ti turin engtikah mah inpeih dawn lo mah ila a tawp nan he jersey hi ka hlip ang a, uluk taka thlep chungin ka dah ṭha tawh ang," tih chu mittui tla chunga Francesco Totti kam chhuak a ni a, Italian forward ropui hi khelmualah a hmel kan hmu leh tawh ngai dawn lo.

Stadio Olimpico-ah 'Totti' tia mipui sing tel au thawm hriat tur a awm tawh ngai dawn lo a, Roma jersey no 10 hatuin a kut zungpui fawp chunga a goal khung a lawm hmel hmuh tur a awm tawh dawn lo - ni e, a tawp tak tak ta.

Game hnuhung
Pathianni zan khan AS Roma chuan Serie A match-ah Genoa mikhualin 3-2 in an hneh a, league-ah pahnihna nichungin season tharah Champions League an khel dawn. He inkhel hi 1992-93 season-a a match hmasa ber kheltu Totti tan khelmuala a inlan hnuhnung ber a ni.

Kum 40-a upa forward hi Roma tan player pawimawh a ni phak tawh lo a, Genoa nena an inkhel hi Champions League an khelh dawn leh dawn loh hril theitu a nih avangin bench-ah dah a ni. Minute 54-naah Mohamed Salah thlak turin Totti a tlanlut a, thawm chu ring tak a ni. Minute 36 hnuah hun a tawp a, Italian legend-in a boot a khai ta - Rome khawpuiah mittui a luang a, an fapa rangkachak inkhel lai an hmu leh tawh ngai dawn lo!

Rome Lalpa
Kum 2006-ah khan Real Madrid-in Totti lakluh an tum a, a hunlaia player 'hot' tak hian Spanish club hausa sawmna a hnar. Italian forward-in Real a hnawl hi khawvelin mak a ti a, Totti zawhna dawn chu, "Engtinnge i hnar theih?" tih hi a ni. A hmangaih hmasaah Totti a chiang a, "Sikul kan kal laiin kan tana pawimawh ber chu chhungkua a nih thu an sawi ṭhin. Roma hi ka chhungkua a ni a, a chhungte rethei tak kalsana chhungkaw hausa zawk bel ta sawi tur in hre tawh em ni?" tih chu a chhanna a ni. Totti-a'n sum tam tak chan mah se khawvel hausaknain a lei theih loh hmangaihna tam tak Rome-in a pe let thung.

Totti-a'n Roma tan Serie A nomawi vawi khat chiah chawi mah se an khaw club a chhuahsan lo hi a inchhir phah lo. Italian Cup leh Super Cup-a vawi hnih ve ve champion bawk forward chuan, "Roma tana league nomawi vawi khat chawi hi ka tan chuan Juventus emaw Real Madrid-a vawi 10 chuang champion aiin a hlu zawk," a ti a, a thusawi langsar dang pakhat chu, "Roma tana inkhelin ka seilian a, he club tana ka nunna ka hlan thlenga khelh ka duh a ni," tih hi a ni.

Zinkawng ngaihnawm
March 28, 1993-ah Totti-a'n Roma tana a match hmasa ber a khel a, hetihlai hian kum 16 leka upa a ni. Kum 24 a liam leh meuh chuan Roma tan match 786 khelin goal 307 a khung sak a, AC Milan legend Paolo Maldini nen Serie A-ah season 25 ngawt khelin khel hnem ber an ni - Serie A season 23-ah goal khungin season heti zat goal khung thei dang an awm lo!

Kum 22 leka upa a nihin Roma tan captain armband a hreng a, Rome club tana captain ni thei naupang ber a ni. 2006-07 season-ah goal 32 khungin season khata goal a khung hnem ber ṭum a tawng a, Serie A-ah goal 26 khungin European golden shoe a dawng.

Ram tan Totti
Totti-a'n Roma tan nomawi lian tham panga chiah chawi mah se Italy tan erawh Euro 2000 leh World Cup 2006 nomawi a chawi. Hengah te hian a tikimtu mai a ni lo tih tichiangtu chu 'team of the tour­nament'-ah an champion ṭum hian a lang phak ve ve - Italy tan match 58 a inlanah goal kua a khung.

Mimal chawimawina lamah pawh Totti nomawi hunna dawh­kan a ruak lo hle - Serie A Young Foot­baller of the Year (1999), Serie A Footballer of the Year (2000, 2003), Serie A Italian Foot­baller of the Year (2000, 2001, 2003, 2004, 2007), Serie A Goal of the Year (2005, 2006) leh Golden Foot-te chu chawimawina tam tak a dawn zinga langsar a ni a, FIFA 100-ah a lang phak bawk.

Mangṭha football
"Kum 28 chhung hun ka lo hman tawh kha thumal tlemte hmanga sawifiah chu har tak a ni. Hla emaw hla chham hmanga he club hi mangṭha ka duh a, mah se engmah ka ziak thei si lo," tiin Totti-a'n lungchhe takin a hmangaih a club a mang ṭha.

"Vawiin ka thu sawi hi in vaia tan ka hlan a, min ṭawiawm ṭhintu te tan ka hlan. Ka career chu thawnthu mawi takin, in inhlan chhawn zel turin tih tawp a ni ta," a ti a, Roma arsi êngmawi a her liam ta.

MangṬha Totti
Francesco Totti hi Rome khawpui tan Lal a ni a, player ka hmuh tawh a zawnga thiam ber a ni. - Argentina legend Diego Maradona 
Ka goal vena a goal khung tam tak kha chu a ropui lutuk a, lo dang thei ta pawh ni ila 'thil mawi' dangtu mai ka ni ang. - Italian legend Gianluigi Buffon
Totti hi Roma jersey ha tawha player ropui ber a ni. - Roma chairperson hlui Rosella Sensi
Totti hi football chei mawitu a ni a, keimah ang maia number 10 dik tak a ni. - French legend Michel Platini
Totti hi Roberto Baggio leh Alessandro del Piero aiin a ṭha zawk a, kei ai pawhin a thiam zawk.
- AC Milan legend Gianni Rivera
Italian football hriatrengna chu Totti hi a ni.
- Italy coach hlui Marcello Lippi

Hlawhtlinna tam tak a lo chhar tawh a, Totti hi hmun hrang hranga football ngainatute tan chuan thilpek hlu tak a ni a, Roma chhungkua hian kan hmangaih a ni.
- Roma boss Luciano Spalletti
Totti hi football pathian chu a ni. Kum 16 leka upa a nihin a inkhel ka en tawh a, pass, shot, free kick, penalty - engkim mai hi a thiam nghal vek a ni.
- Inter legend Sandro Mazzola
Rome Lalpa chuan a game hnuhnung ber a khel ta. Chawimawina a dawn zawng zawng kha a phu em em vek a, a team tana a rinawmna avang hian zah a phu takzet a ni. - Liverpool legend Steven Gerrard
Mi pangngai chunga leng mihring a ni a, career ropui tak a hmang a ni. Totti hnuaiah chuan tupawh an inlungrual a, a chunga lungawi lo ka la hmu lo.
- Roma midfielder Daniele De Rossi