City ṭuan a rang

Pep Guardiola season khatnaah Manchester City-in nomawi an chawi lo a, Spanish manager-in season tharah chuan a danglam tur thu sawiin a takin an lantir nghal bawk.

City-in pound maktaduai 43-in Ligue 1-a Monaco champion puitu Bernardo Silva an lalut tawh a, veteran goalkeeper Willy Caballero chu Zirtawpni khan chhuahtir a ni.

English club hian Argentine keeper thlak nan Benfica goalkeeper Ederson Moraes an lalut thuai dawn niin a lang. Pathianni khan Portuguese Cup-ah Benfica hian Vitoria Guimaraes 2-1 in an hneh a, Brazilian keeper Moraes hian club tana a inkhelh hnuhnung ber a nih theih thu a sawi.

Kum 23 mi Ederson hian Chilean keeper Claudio Bravo chu a elpui phak beisei a ni a, first keeper ni tura inchuhna boruak a sang sawt ang.

City player zingah hmalam hun chiang lo an awm nual a, striker Kelechi Iheanacho chu West Ham zawm tura beisei a ni. Season liam taa loan-a club dang zawm Joe Hart, Samir Nasri, Wilfried Bony leh Eliaquim Mangala te hmalam hun a chiang lo.