Vettel-a'n hma a hruai fal ta
Pathianni zana tlan zawh tak Formula 1 Monaco Grand Prix-ah Sebastian Vettel-a'n hnehna a chang. Ferrari driver hian rider championship-ah point 129 hmuin amah hnaih bertu Lewis Hamilton aiin point 25 zetin hma a hruai fal ta.
France-a intlansiakah Vettel hian lap 78 chu darkar khat, minute 44 leh second 44.340 chhungin a thleng a, pahnihna chu a teammate Kimi Raikkonen niin an inkarah second 3.1 chiah a awm. Raikkonen hian kum kua hnuah pole position chang ve leh chauh mah se pit stop hmang ṭha zawk Vettel a tluk lo a ni.
German tlangval hian Monaco-ah vawi hnih hnehna a channa chiah a ni a, Formula 1 car a khalh hnuah ṭum 45 hnehna a chang tawh. Pathianni zana hnehna an chan tak hi Ferrari tan chanchin ṭha a ni, he hmunah hian world champion vawi sarih ni thei Michael Schumacher-a'n kum 2001 khan hnehna a chang tawh a, he mi hnuah tun ṭum hi chak ni hmel an hmuh lehna hmasa ber a ni.
World champion vawi li ni tawh Vettel chuan, "Season hmasa khan kawng hrang hrangin harsatna kan tawk a, kuminah erawh Ferrari tan hun ṭha a in herchhuak ve mek zel a ni. A bul kan ṭan ṭhat ang bawkin a tawp pawh kan khar
ṭha a, he boruak ṭha tak hi season tawp thleng chhawm nun zel kan tum ang," tiin a sawi.
Australian driver Daniel Ricciardo chuan tlankawng sir nek palh deuh mah se pathumna a thleng thei tho a, tun season aṭanga Mercedes car khalhtu Mercedes chu palina a ni.
World champion nilai Hamilton-a'n qualifying lamah beisei a phak loh avangin 13-na aṭangin bul a ṭan a, British driver hian nasa takin beilet mah se pariatna ni chungin intlansiak a khar.
Hamilton chuan, "Monaco-ah hian inlehpelh a harsa takzet. Hmahruaitu tan hnehna chang thei turin dinhmun a ṭha nghal, tun ṭuma thil thlengah khan Ferrari thil tum chiang takin a lang. Raikkonen aiah Vettel kha pakhatna nihtir an duh zawk a ni," tiin a sawi. Hetihlai hian Vettel chuan intlansiak ṭan hmain chak tur zawk ruahmanna an siam loh thu a sawi ve thung.
McLaren driver Fernando Alonso aiawhtu Jenson Button-a'n beisei a phak lo bawk. Kum 2009 world champion hi lap 57-naah chesualin intlansiak a tlan tuan ve thei lo. Force India driver pahnih Esteban Ocon leh Sergio Perez te chu 12 leh 13-naah an thleng thung a ni.
Kumin-ah Formula 1 intlansiak hi vawi 20 neih tur a ni a, paruk an tlan tawh. Round 7 atan June 11 khian Canadian Grand Prix an tlan leh ang.
Formula 1 MonacoGP Results
# Driver Team
1 Sebastian Vettel Ferrari
2 Kimi Raikkonen Ferrari
3 Daniel Ricciardo Red Bull
4 Valtteri Bottas Mercedes
5 Max Verstappen Red Bull
6 Carlos Sainz Toro Rosso
7 Lewis Hamilton Mercedes
8 Romain Grosjean Haas
9 Felipe Massa Williams
10 Kevin Magnussen Haas