CYMA Football Pali dang a hriat dawn
CYMA leh MFA ṭangkawpin an buatsaih TṬ Royte Trophy - Inter Branch YMA Football Tournament-ah team pariatin last 16 an lut tawh a, vawiinah team pali dang a hriat belh ang a. Zonet chuan CYMA Football hi live-in a pechhuak dawn.
Match hmasa berah West Phaileng leh Chanmari an inkhel dawn. Champion lai Armed Veng hnehtu Chanmari hian coach-ah Chawngthansanga an nei a, MPL-a an defender Lalrinchhana leh Lalmuanawmaṭ- te an neih bakah midfield-ah Rochhingpuia neiin a hmaah Jerry Mawihmingthanga a awm bawk - player langasar nei lo West Phaileng hian an hlau bik hauh lo ang.
MPL club nei Ramhlun North-in 2005 champion Republic Veng an hmachhawn dawn. Santosh Trophy-a Mizoram player pawimawh V. Lalchhuanawma chu Ramhlun North match hnih khelh tawhah goal khung ve vein veteran midfielder Vanlalmawia'n (Buangpuia) midfield-ah a la ho thei a, Republic Veng lamin Mizoram striker ṭha F. Lalrinpuia an kawl thung.
CYMA Football-a team ṭha zinga mi Venghlui chu Khatla Veng lakah an tlawm a, vawiin tlai dar 1:30 hian Khatla hian inkhelh thiam khua Hualngohmun an tum dawn. Khalta-in tlarhmaah Michael Lalremruata, Jesse Laldinpuia leh Johny VL Muanpuia te an kawl a, Hualngohmun-in MPL-a player pawimawh ni phak Vanlalthanga, Lalramtharmawia leh Lalhmunmawia-te an nei a, intum tawk tura ngaih an ni.
NECS Cup champion Chhinga Vengin Last 16 lut turin Ṭhiak leh Puilo hnehin goal 19 an khung thei a, Ramhlun Vengtharin Changzawl leh Zotlang hneh turin goal 11 an khung thung. Chhinga Vengin goal an la chhuah loh laiin Ramhlun Vengtharin clean sheet an nei lo. Football-ah eng pawh a thleng thei a, Ramhlun Vengtharin hlauh nei loa an khelh chuan a hmuhnawm viau ang,
CYMA Football khelh mekah hian ITI Veng, Leitan, Chatlang, Aizawl Venglai, Zawlnuam Borai, Lengpui, Ramhlun South leh Republic Vengthlang ten Round of 16 an lut tawh a, intum turte hi pawh ṭhat leh tur a ni.
Vawiin Inkhel Tur
09:30 AM West Phaileng Jt YMA Vs Chanmari
11:30 AM Ramhlun North Vs Republic Veng
01:30 PM Hualngohmun Vs Khatla
03:30 PM Ramhlun Vengthar Vs Chhinga Veng
May 31, Nilaini
09:30 AM Khawlailung Vs Salem Veng
11:30 AM Kelsih Vs Bawngkawn
01:30 PM Durtlang Vs Luangmual
03:30 PM College Veng Vs Kawnpui Vengthar