Venus Williams a la tar lo

Kum 37-na piancham lawm turin chawlhkar hnih chuang hret bak a mamawh tawh lo, American star Venus Williams hi a kum tam deuh tawh mah se court chhungah a la tar lo. Pathianni zan khan Venus hian Wang Qiang chu 6-4, 7-6(3) a hnehin French Open second round a inhlangkai.

Grand Slam vawi 7 cham­pion tawh Venus hian kum 15 liam ta khan French Open final hi a lo khel daih tawh a, a nau Serena Williams lakah a chak lo. Kumin hi Roland Garros-ah vawi 20 an inlanna chiah a ni, final vawi khat a thleng ve tawh tih loh hi chu quarterfinal a la paltlang lo. Clay court-ah a hlawhtling hlei thei lo tihna a ni.

Venus chuan, "Kum 20 a liam ta der mai, ka tan chuan tennis-ah hian thil tam tak a thleng tawh a, a thleng zel bawk ang. Ka match hmasa berah ka duh dan takin ka khingpui nawrtu zawkah ka ṭang thei a, khatiang taka khelh chhunzawm theih kha ka duh," tiin a sawi.

Kumin French Open-ah hian Grand Slam vawi 23 champion tawh Serena Williams chu nau a pai avangin a inlan thei lo a, hrem a tawrh hnua rawn kir hlim Maria Sharapova-i'n wildcard a hmuh loh avangin a inlan thei lo bawk. World number 1 leh seeded pakhatna ni bawk Angelique Kerber-i chu a match hmasa berah a chak loh nghal bawk avangin hmeichhe singles champion tur rin thiam a harsa ta hle.

Rinkai Thiem

Mipa singles lamah cham­pion tura rinkai ni phak Domi­nic Thiem chuan Bernard Tomi lakah darkar khat leh minute 20 chhung lekin 6-4, 6-0, 6-2 in hnehna a chang. Thiem hian a service ṭhat hmang ṭangkaiin vawi 11 aces a siam thei a, double faults vawi khat chiah neiin winners vawi 32 a vawi thei a ni.

Seeded parukna Thiem hian French Open inbuatsaihna Rome Open quarterfinal-ah Rafael Nadal a hneh thei, Austrian tlangval chiah hi kumin clay court inelna huang chhunga Nadal hneh thei awm chhun a la ni rih.

Kum 23-a upa Thiem chuan, "Kan inkhelh ṭan hma khan ka zam ve hle, khua a lumin ka khingpui tur kha player namai lo tak a ni bawk. Set khatna harsa takin ka la hram a, a hnuhnung pahnih erawh a harsa tawh lo," tiin a sawi.

French Open hi...

Grand Slam tournament pali zinga clay court-a an khelh awmchhun French Open 2017 hi kum 1891 aṭanga khelh ṭan niin, kumin hi vawi 116 an neihna chiah a ni.

Kum dang ang bawkin tun ṭumah hian inelna category chi hrang hrang - singles, doubles leh mixed doubles a awm. Junior leh wheelchair player-te tan inelna buatsaih a ni bawk. Mipa champion lai chu Novak Djokovic niin hmeichhe nomawi kawltu chu Garbine Muguruza a ni thung.

Inelna hi court hrang hrang 22 zetah khelh mek a ni a, heng zingah hian Court Philippe Chatrier, Court Suzanne Lenglen leh Court 1 te chu player langsar leh inkhel pawimawh bik khelh nana vohbik a ni. Mipa leh hmeichhe singles-ah player 32 ve ve chu seeded an ni a, heng category pahnihah hian wildcard pariat pekchhuah a ni bawk.

International Tennis Fede­ration (ITF) buatsaih, ATP leh WTA World Tour calendar a event lian pakhat French Open hi Grand Slam tournament dang Australian Open, Wimbledon leh US Open te nen a khelhna hmun a danglam em avangin beisei loh result kan hmu fo - thahrui hman tam ngaihna ber tiin an sawi ṭhin hial reng a ni.