Mizoram badminton-in bung thar kai dawn

Mizoram Badminton Association leh Tata Trusts te chuan May 26, Zirtawpni khan thawhhona thuthlung an ziak a, ruahmanna hi a taka chantir theih a nih chuan Mizoram badminton hmel a danglam thei ang.

Thawhona hmasa atan MBA leh Tata Trusts ṭangkawpin Talent Search Tournament chu June 14-16 , 2017 inkar hian buatsaih a tum. Inelna hi mipa leh hmeichhe tana siam tum niin Under 11, Under 13 leh Under 15 category-ah te ṭhen tur a ni.

Aizawl-ah Gopichand

India shuttler hrang hlui leh tuna India chief national coach ni bawk Pullela Gopichand leh a hnuaia coach-te chuan final an rawn thlir dawn. Talent Search Tournament-a tiṭhate hian India chief national coach mit an tlung a nih chuan Gopichand Badminton Academy, Hyderabad-ah an awm ang.

Tun hnaiah India-in badminton-ah hma a sawn a, Gopichand hi sulsutu a ni. Gopichand Badminton Academy chhuak Saina Nehwal chuan 2012 Summer Olympics-ah bronze medal a la a, Olympic hnuhnung berah khan P.V. Sindhu chuan silver medal a la bawk. Anni pahnih bakah hian Indian shuttler ṭha Parupalli Kashyap, Srikanth Kidambi, Arundhati Pantawane, Gurusai Datt leh Arun Vishnu te chu Gopichand hnuaia inzir chhuak a ni.

Hmabak a êng

Mizoram badminton hmasawnna turin Grassroot Development leh Mizorama World Class High Altitude Training Centre neih chungchang te pawh sawiho a ni a, hei hi a hlawhtling a nih ngat chuan badminton kaltlangin India ramah Mizoram hming a lang thuai ang.

Tata Trusts head of sports Anand Datla chuan, "Tata Trusts hian infiamnaa India ramin hma a sawn theih nan grassroots hi a ngai pawimawh takzet a, Mizoram-ah hian theihna sang tak a awm tih a hmu a ni. Keini chuan badminton-in hma a sawn theih nan sorkar leh Pullela Gopichand Badminton Academy te nen thawh ho a, hmathlir thui zawk nena pen zel turin kan inpeih a ni," tiin a sawi.

MBA honorary secretary H. Lalnunsiama chuan, "Badminton khawvela mi ropui leh India rama badminton chawi sangtu Gopichand a rawn kal tur hi Mizoram badminton-in nasa taka kan hlawk phah beisei a ni. Tata Trusts nena kan thawhhona tur hian keimahniah phur nasa tak a siam a. Beisei kan nei sangin theihtawp a lo ṭan tlan kan tum a ni," tiin a sawi ve bawk.