Europe-ah striker an hrang

Khawvel huapa league ngaihhlut hlawh awm tamna Europe-a league sang zingah Premier League, La Liga, Serie A, Bundesliga, Ligue 1 leh Primeira Liga season a zo a, ṭum dang ang bawkin striker an langsar hle.

League sang paruk zingah Lionel Messi chu goal khung hnem ber a ni a, Barcelona forward hian match 34 lek a khelhah goal 34 a khung avangin European Golden Shoe a dawng dawn tih a chiang tawh - La Liga nomawi an chawi loh kumah pawh Messi ropuina a chuai chuang lo.

Messi a ropui ber

Kum 29-a upa Messi-a'n sea­son hmasaah goal 41 a khung a, league bika a goal khung zat chu 26 niin Barcelona tana a khelhpui Luis Suarez a phak lo - Uruguayan striker hian inelna hrang hrangah goal 59 ngawt khung­in league-ah goal 40 a khung.

Tun season-ah erawh Mes­si hun a inherchhuak ve leh thung a, Argentine striker hian nikuma a phak loh Luis Suarez (29 goals) leh Cristiano Ronaldo (25) um phak rual lohin La Liga-ah goal a khung hnem ber. Messi-a'n inelna hrang hrangah match 52 khelin goal 54 a khung a, Copa del Rey final la khel leh tur a nih avangin a goal khung zat hi la danglam thei a ni.

Ibra thlaktu Cavani

Paris Saint-Germain tan season hmasaah Zlatan Ibrahimovic a vul a, mah se Swedish striker ropui hian a contract hmang zoin Manches­ter United a pan. Ibra chhuah vanga PSG fan-te an nguai laiin hliahkhuh a nihna aṭangin Edinson Cavani a par chhuak a, league match 36-a khelhah goal 35 khungin Europe-a league goal khung hnem lama Messi hnaih bertu a ni.

Uruguayan striker hian inelna hrang hrangah match 50khelin goal 49 a khung - amah hnaih bertu Alexandre Lacazette chuan Lyon tan league-ah goal 28 bak a khung lo.

Beisei loh Dost

Europe league sang-a goal khung hnem top three-ah hming langsar ngai lo pakhat a lang a, a hming chu Bas Dost a ni. Wolfsburg aṭanga hriat hlawh striker hian tun season ṭan dawn khan German club aṭangin Sporting Lisbon a pan a, Primeira Liga-a a season hmasa berah goal 34 ngawt a khung nghal.

Dutch striker hian inelna hrang hrangah match 41 khelin goal 36 a khung a, pound maktaduai riat bawr vela leitu Sporting-in lei fuh an inti tawh ngawt ang!

Lewy chungah Aubameyang

Bayern Munich striker Robert Lewandowski-a'n league-a goal khung hnem lama a tluk loh chu Pierre-Emerick Aubameyang a ni. Borussia Dortmund striker hian league match 32-a khelhah goal 31 a khung a, a hnuaiah goal 30 khungtu Lewy a awm. Aubameyang hian inelna hrang hrangah match 46 khelin goal 40 a khung.

Italian football-ah goal khung a harsa ṭhin a, Manchester City striker hlui Edin Dzeko tan erawh harsatna a awm ve lo. AS Roma striker hian league match 37 a khelhah goal 29 a khung tawh a, league match khat khelh tur la awmah amah hnaih bertu Napoli forward Dries Mertens chuan goal 28 a khung ve bawk.

Kane a nep lo

Tottenham Hotspur striker Kane-a'n 2014-15 season-ah inelna hrang hrangah goal 31 a khung a, khawvelin English striker hi rinhlelhna mita thlir chungin 'season khat bak a daih lo ang' an ti. Mahse, 2016-17 Premier League season a tawp meuh pawhin Harry Kane-a'n goal khung a la ṭhulh thei lo - amah ringhleltute an bibo zo tawh!

Kum 23-a upa striker hian tun season-ah league match 30 khelin goal 29 a khung a, inelna hrang hrangah match 38 khelin goal 35 ngawt a khung - hliam vangin kar riat vel a chawl zawk mah. Pre­mier League-a goal khung hnem lama Kane hnaih bertu Romelu Lukaku-a'n goal 25 a khung a, pathumna Alexis Sanchez khung zat chu goal 24 a ni.