Mexico tana goal khung hnem ber Chicharito

Javier Hernandez chuan Croatia nena friend­ly match an khelhah 2-1 in Mexico chakpui zo lo mah se an ram goal neihchhun hi a khung a ni a, Mexico tana goal khung hnem ber dinhmun a luah chhuanzawm nghal.

Kum 28-a upa striker hian ram tan match 91 khelin goal 47 a khungna chiah a ni a, Mexico tan goal 40 khung tura match mamawh tlem ber dinhmun a lo luah tawh bawk. Chicharito tia hriatlar striker hian Jared Borgetti record a khum a, Bolton Wanderers striker hlui hian Mexico tan match 89 a khelhah goal 46 khungin he record hi March khan Chicharito hian a lo nihrual tawh a ni.

Mexico coach Juan Car­los Osorio chuan, "Javier hi khawvel huap pawha goal khung thei ber pawl a ni," tiin a stri­ker hi a fak a, tun hnaia Manchester United striker hlui chet dan enin Colombian manager hian dawt a sawi lo tih a lang. Old Trafford aṭanga Bayer Leverkusen a pan hnuah season hnih hun a hmang tawh a, match 76 khelin goal 39 ngawt a khung tawh.