Fabregas a lungawi lo

Chelsea midfielder Cesc Fabregas chuan FA Cup final-a Arsenal an hmachhawnna inkhela bul ṭantir a ni lo chu van­duaithlak a tih thu a sawi chhuak mauh mai. Kum 30-a upa midfielder hian inkhel bul ṭan lo mah se minute 61-naah erawh luhtir tho a ni a, Gunners lakah 2-1 in an tlawm.

Arsenal captain hlui chuan, "Tun hnaiah ka khel ṭha thei em em a, inkhel bul ṭantir ka ni lo kha chu a zahthlak zawk a ni. Player zawng zawngin a tam thei ang ber khelh an duh a, chu chu chak duh player-te thinlunga thil intuh nghet tak a ni. Tun aia ṭha zawka khelh dan hi a vang tawh a, mahse a chang chuan coach thutlukna kan zah mai hi a ṭul si," a ti.

Fabregas hian tun season-ah Chelsea tan match 15-ah chauh in­khel bul ṭan mah se heng zinga match li hi Premier League-a an match hnuhnung paruka a bul ṭan a ni a, inelna hrang hrangah match 37 a inlan.

Kum 2014-a Barce­lona aṭanga Chelsea pan­tu midfielder hian FA Cup-ah inkhel bul a ṭan loh avangin lungawi lo mah se Blues chhuahsan tumna erawh a nei lo. Spanish midfielder chuan, "Eng thil pawh thleng thei a ni a, mahse he hmunah hian fan-te avangin ka hlim em em a ni. Keichuan manager ngaihtuahna tihdanglam ka tum mai a ni," tiin a an chhuah chhan a sawi.