Wenger a cham zel dawn?

Arsenal manager Arsene Wenger chuan a contract thar chungchanga a thil tih theih pawimawh leh langsar chu FA Cup champion kha nia a hriat thu a sawi chhuak.

Gunners hian Inrinni zan khan Chelsea 2-1 a hnehin a vawi 13 nan FA Cup champion an ni. Wenger-a'n a enkawl chinah vawi sarih an champion-na niin French pachal hi manager zinga he inelnaa hlawhtling ber a ni.

Kum 67-a upa Wenger chuan, "Ka contract tawp rak thlengin ka theihtawp ka chhuah, ka hma hun chungchang atana ka tih theih pawimawh chu FA Cup nomawi kha a ni," a ti.

Wembley Stadium-a inkhel kha Arsenal mi pawimawh ten a hmunah an en, chief executive Ivan Gazidis leh Keswick bakah director Ken Friar leh Lord Harris te leh club secretary David Miles-a'n an en uluk hle a ni.

Wenger chuan sawi chhunzawmin, "Tunlai khawvelah mi tam takin thil danglam leh inthlakthleng hmuh thuai thuai an duh ṭhin, football-a pawimawh ber erawh thutlukna dik siam a ni. Club thuneituten an sawi khawm dawn a, he club ṭhan zelna atan ṭha turin thutlukna an siam ang, chutah keiin ka hma hun ka ti chiang ve thung dawn a ni," tiin a sawi.

Arsenal manager ṭang tawh zinga hlawhtling bera ngaih theih Wenger hian a vawi khat nan season tharah Champions League a khel phak dawn lo a, heti chuang hian season hnih chung atan contract thar an sawi hmuh nia tarlan a ni - Ninganiah thutlukna siam a ni ang.