Juve season khar nan Kean record thar
Serie A chu Pathianni zan khan khelh zawh a ni. Champion Juventus chuan an match hnuhnung berah Bologna 2-1 in an hneh.
Stadio Renato Dall'Ara-a inkhelah Saphir Taider chuan goal hmahruai khung mah se Juventus-in Paulo Dybala leh Moise Kean te goal hmangin an chhanglet. Chakna goal khungtu Kean hi kum 17 chauha upa a la ni a, Europe League lian pangaah kum 2000 hnulama piang player zinga goal khung thei hmasa ber a ni.
Massimiliano Allegri enkawl Juventus hian tun season-ah match 38 an khelh aṭangin vawi 29 hnehna changin Serie A champion an ni a, an hnuai chiahah hian vawi 28 hnehna chang thei AS Roma an awm. Turin club hian Serie A bakah Coppa Italia nomawi an chawi tawh a, Champions League final khelh hmabak an la neih bawk avangin treble champion nih theihna hun ṭha an nei mek.
Italy aṭang hian a sang pahnih Juventus leh Roma te hian season tharah Champions League an khel dawn chiang a, pathumna Napoli tan playoff khelh a ngai thung. Europa League khel turin Atalanta leh Lazio te an tlin nghal laiin parukna AC Milan tan playoff khelh a ngai ve thung bawk ang.
Kumin Serie A-ah khan match 380 khelh niin goal 1,123 a lut a, club zinga goal khung hnem ber chu Roma (90 goals) an ni. Juventus-in match 16 chhung zet hneh loh nei loin an kaltluang thei a, hetihlai hian Pescara erawhin match 22 chhung chu chak ni hmel an hmu lo thung. Pescara bakah Palermo leh Empoli te chu an relegate a ni.
Tun hnaiah Milan leh Inter-in beisei phak lo deuh mah se an pahnih inkhel boruak erawh a la nep thei chuang lo. Kumin April 15-a an inkhel kha 78,328 zetin a hmunah an en a, entu tam ber ṭum a ni. Crotone leh Palermo te inkhel entu erawh 510 chauh niin entu tlem ber ṭum a ni thung.