Barcelona coach thar Valverde

Spanish club Barcelona chuan coach atan Ernesto Val­verde an lakluh thu an puang. Athletic Bilbao boss hlui hian Nou Camp-ah kum hnih cham turin contract a ziak a, a ṭul dan a zirin kum khat dang pawhsei leh theih a ni ang.

Kar hmasa lawka Bilbao a chhuahsan tur thu puangtu manager hian season thum leka nomawi pakua chawi thei Luis Enrique a thlak dawn a, a lakah beiseina a sang dawn.

Barca president Josep Maria Bartomeu chuan, "Pla­yer naupang zawkte chher thiam tak a ni a, a game kal­phung hi Barcelona duhdan nen a inmil a ni," tiin kum 53-a upa manager an lakluh chhan a sawi.

Tu nge Valverde?
Valverde hian player a nih laiin Alaves, Sestao, Espan­yol, Barcelona, Athletic Bil­bao leh RCD Mallorca-ah te a khel a, Barca-a pan hian kum 24 chauha upa ni mah se hliamin a tihbuai vangin season hnihah match 24 chauh a inlan sak a, goal riat a khung. Spain tan vawi khat a inlan ve tawh a, a hun tam ber a hmanna Bilbao-ah season li a khelh chhungin match 170-ah goal 44 a khung.

Kum 1997-a inkhelh a chawlhsan rualin Athletic-ah youth team coach dinhmun a luah nghal a, 2003-ah senior coach-ah hlankai niin season hnih a cham hnuah Espanyol a pan. Catalan club hi a season hmasa berah UEFA Cup final a luhpui a, season hnih hnuah bawk a chhuahsan.

Bilbao legend
Spanish manager hian Espanyol aṭanga Olym­piakos-a pan hnuah Greek Super League leh Greek Cup a chawipui nghal a, Spain-ah kirin Villarreal a enkawl. Mahse, Yellow Submarine-ah kum khat pawh hun a hmang hman lo tihin Greece-ah bawk a kir a, season hnih chamin league-ah Olympiakos a champion pui ve ve a, Greek Cup vawi khat a chawi leh bawk.

Valverde hian Valencia chu season khat a enkawl ve leh zawk a, a hmangaih hmasa Athletic Bilbao-ah kir lehin kum 2015 khan Spanish Super Cup a chawipui - kum 31 hnua an nomawi chawi hmasak ber niin Barcelona chu 5-1 in an sawp.

Valverde leh naupang
Barcelona-in an player hlui Valverde an lakluh chhan ber nia lang chu naupang chher a thiam vang niin a lang. Athle­tic-in an kalphungah club innghahna Basque huam chhunga mi player ni lo an chhawr thei lo a, heivang hian an youth academy aṭanga chhuak players an chhawr nasa. Valverde-a player chher thiam­na nemnghettu te chu defender Aymeric Laporte, right back Inigo Lekue leh winger Inaki Williams-te hi an ni - Europe club liante chil ti puttu an ni mek.

An youth academy La Masia vanga hmingṭha ṭhin Barcelona-in an senior team-ah kum 28 hnuai lam an youth system chhuak player regular an neih chu Rafinha leh Sergi Roberto-te chiah an ni tawh a, Lionel Messi chherchhuaktu club hian 'Messi' dang thur chhuak turin Valverde an beisei - a hna a awlsam dawn lo.