Chanmari leh Republic Veng chak Chhum zing vangin inkhelh hun sawn

TṬ Royte Trophy CYMA Inter Branch YMA Football Tournament-ah nimin khan Chanmari leh Republic Veng ten an khingpui West Phaileng leh Ramhlun North hnehin Round of 16 an lut. Inkhel dang pahnih erawh ruah­sur leh chhum zing vangin inkhelh hun sawn a ni.

CYMA leh MFA ṭangkawpin an buatsaih football inelnaah hian team 10-in Round of 16 an lut tawh a, chung team te chu ITI Veng, Leitan, Chatlang, Aizawl Venglai, Zawlnuam Borai, Lengpui, Ramhlun South, Republic Vengthlang, Chan­mari leh Republic Veng te an ni.

5 Star Chanmari

Nimin inkhel hmasa berah Chanmariin Rosangliana hmangin minute 10-na lekah West Phaileng lakah goal an khung a, inkhel an thunun. Chanmari tan rawlthar duhawm Lalnunzama leh DSK Shivajians forward Jerry Mawihmingthanga ten goal khat ve ve a khung belh a, first half-ah 3-0 a ni.

Second half-ah West Phaileng-in chance ṭha ngah mah se goal an khung miau loh avangin 2012 Red Ribbon Football champion Chanmariin hlauhthawn lai an nei lo.

Chanmari tlangval Jerry-a'n ama penalty hlawhchhuah a hlah hnuah minute 82-naah goal hnihna a khung a, hun tawp hma hretin Zamzama'n a goal hnihna leh Chanmari goal ngana a khung leh bawk.

Hei le, Republic Veng

Republic Vengin goal 25 khungin last 32 an lut a, MPL club nei Ramhlun North hmaah erawh goal khung an harsat.

Ramhlun North tlarhnung chu National Junior C'ship-a best player Hmingthanmawia (Valpuia) hmangin thawm ṭhat a ni a, Republic Veng goal nawr a nat zawk avangin Police keeper Lalṭanpuia chu first half-ah a langsar bawk.

Ruahsur leh chhum zing vangin inkhel a mumal thei lo a, minute 58-naah Republic Veng striker F. Lalrinpuia'n goal awm chhun a khung. Ramhlun North-in freekick-ah bak goal hlauhawm an nei lo a, chak phu zawk Republic Vengin hnehna an chang.

Inkhelh hun sawn

Niminah inkhel pali awm tur a ni a, ruahsur vangin inkhel pahnih chiah khelh zawh theih a ni.

Chawhnu lama Hualngo­hmun leh Khatla bakah Ram­hlun Vengthar leh Chhinga Veng inkhel tur chu June 1, Ninga­nia inkhel turin sawn a ni.

Inkhel pali

Vawiin match hmasa berah Khawlailung leh Salem Veng an inkhel dawn. Khawlailungin Lalrinfela leh R. Lalthantluanga te an neih avangin Aizawl khaw pawn team ṭha ber zinga mi an ni a, an khingpui tur Salem hian Joseph Lalnunpuia leh a nau Israel Laldingngheta bakah David Lalchhuanawma leh midfielder duhawm R. Lal­-

ṭhapuia te an kawl ve bawk.

Champion rinkai zinga mi Bawngkawnin H. Lalmuan­kima, Lalnuntluanga leh MS Dawngliana te an kawl a, NECS Cup finalist hian Kelsih aiin player chu an nei ṭha.

Durtlangin tun hma an pha lo a, Luangmualin MPL club an neih loh hnuah ngai an awh tawh lo. Amaherawhchu tun ṭum hi veng inelnaah chuan Luang­mual ṭhat ber ṭum a ni a, Lalramzauva bakah MPL leh state pawn lama tawnhriat nei an kawl nual a, Durtlang lamah Ricky Lallawmawma chu team chakna hnar a ni.

Inkhel hnuhnung berah College Veng leh Kawnpui Vengthar te an inkhel dawn a, hei hi hmuhnawm tura ngaih a ni. College Veng hi 2003-a final thlen puitu H. Van­lalthlanga'n a ho a; Albert Zohmingmawia, H. Lalbiak­thanga leh Vanlalhruaia te telna Kawnpui Vengthar lakah fiahin an awm ang.

Nimin Inkhel Results
West Phaileng Jt. YMA 0 - 5 Chanmari
CHA : Rosangliana 10'; Lalnunzama 29', 89'; Jerry Mawihmingthanga 31', 82'
Republic Veng 1 - 0 Ramhlun North
REP : F. Lalrinpuia 58'
Vawiin Inkhel Tur
09:30 AM Khawlailung Vs Salem Veng
11:30 AM Kelsih Vs Bawngkawn
01:30 PM Durtlang Vs Luangmual
03:30 PM College Veng Vs Kawnpui Vengthar
June 1, Ningani
9:30 AM Hualngohmun Vs Khatla
11:30 AM Ramhlun Vengthar Vs Chhinga Veng