Agassi kaihhruai Djokovic a chak

Player langsar rualin kumin­ah beisei an la phak thei lo a, rawl­thar zawkte tan kawng a inhawngah a ngaih theih hman. Inelna lian bikah erawh Andre Agassi kaihhruaina hnuaia khel Novak Djokovic leh Rafael Nadal te chu chelh din rual loha khawng leh chak an la ni.

Thawhṭanni zan Philippe Chatrier Court-ah champion lai Djokovic hian Marcel Granollers chu darkar hnih leh minute 27 chhungin 6-3, 6-4, 6-2 in a hneh a, second round a lut.

Serbian tlangval hian straight set-in hnehna chang mah se awlsam takin first round a paltlang bik lo, khua a lumin inkhelh a harsa hle a, unforced errors vawi 29 a neih bakah break points vawi 20 a hmuh zinga 12 zet chu a chhawr ṭangkai thei lo - nomawi humhim thei tur chuan tihsual neih tlem a pawimawh chho ang.

Grand Slam vawi 12 cham­pion tawh Djokovic hian nikum season chanve hnulam aṭang­in beisei a phak thei rih lo, kum­in­ah pawh January thla khan nomawi pakhat chawi ve mah se hlawhtlinna dang a neih belh thei rih lo.

Clay court inelna liana hlawh­tling turin Djokovic hian 'change' a mamawh, tun thlatir lam khan a coaching staff nen an inṭhen a, Roland Garros atan hian world number 1 hlui Andre Agassi nen an thawkdun, inkhel pawimawh an hmachhawn hmasak berah hnehna an chang nghal.

Kum 30-a upa Djokovic chuan, "Agassi nen hun rei lote kan hman dun chhung hi a

ṭha thei ang bera hman ka tum. Tun dinhmunah chuan ani hi ka mamawh tak a ni, inkhel boruak a manin insiamṭhat ka ngaihna lai tak a hmu fiah nghal thei," tiin French Open atan bika coach atana a hman chu a fak hle.

Inkhelh zawh thuthar theh­darhtu an kawmnaah Djokovic hian Agassi chungchang zawhna a dang hnem hle. A vanglaia Grand Slam palia champion kim thei American legend nen an thawhdun chanchin hi media-te hriatchak leh an chaw tui a ni; Djokovic chuan, "A lehpekah chuan Agassi rawn kal ve tawh se la, in duh in hre thei ang," tiin pa fiamthu duh tak hian fiamthuin a sawi zauh.

Clay lalpa

Grand Slam vawi 14 cham­pion tawh Nadal tan first round paltlang turin harsatna a awm lo. Spain tlangval hian darkar khat leh minute 52 chhung lekin khawtual tlangval Benoit Paire chu 6-1, 6-4, 6-1 in a hneh.

Suzanne Lenglen Court-ah Nadal-a'n ṭantu a ngah a, vawi kua zet nomawi a chawi tawhna hmun a nih a avangin a mikhual lo hle. A khingpui service vawi riat a chhuhsak thei a, world number 45 hmaah hian unforced errors vawi 18 chauh a nei bawk - dan theih loh ang mai a ni.

Kum 30-a upa Nadal hian tun season clay court bikah vawi khat chiah chak loh a la nei, Barcelona leh Monte Carlo-ah a vawi 10 nan a champion tawh; Roland Garros-ah hian nomawi a chawi leh a nih chuan a vawi 10-na tur bawk a ni ang.

Inkhel dang

Season hmasa Wimbledon finalist Milos Raonic-a'n Steve Darcis lakah 6-3, 6-4, 6-2 in hnehna a chang a, US Open nomawi chawi tawh Marin Cilic chuan 6-3, 6-3, 6-3 in Ernests Gulbis a hneh ve bawk.

Thawhṭanni zan inkhel pa­­­khat­­ah rawlthar duhawm Alexan­der Zverev leh Fernando Verdasco te an inhmachhawn a, set khat ve ve an lak hnuah ruah a sur bakah light a chian loh avangin inkhel tihtawp lailawk a ni. Nizan khan an khelh chhunzawm a, he thu buatsaih lai hian result kan hre hman lo.