Dortmund-in Tuchel an ban

Borussia Dortmund chuan an coach Thomas Tuchel chu German Cup champion an nih aṭanga ni hnih hnu lawkah an ban a, Signal Iduna Park-ah kum hnih bak hun a hmang hman lo. Dortmund-in Tu­chel an ban avanga pawi­sa an sen tur zat hi pound mak­taduai 2.5 bawr vel a ni.

Dortmund chuan thu­chhuah siamin, "German champion vawi riat ni thei Dortmund leh coach Thomas Tuchel chu kan inṭhen ta, club CEO Hans-Joachim Watzke, sports director Michael Zorc ten Thomas Tuchel leh a advisor Olaf Meinking an dawr hnuah he thutlukna hi kan siam a ni. Tuchel leh a coaching staff-te hnenah an hnathawh avangin lawmthu kan sawi a ni," an ti.

Tuchel hian July 2015 khan Jurgen Klopp thlakin Dortmund hi a enkawl ṭan a, match 107 a kaihhruaiah vawi 69 hnehna chanpuiin a season hmasa berah league-ah pahnihna a nih­pui a, tun season-ah pa­thumna a nihpui.

Kum 43-a upa coach hi nipui transfer-a Hen­rikh Mkhitaryan, Ilkay Gundogan leh Mats Hum­mels an hralh avang khan CEO Hans-Joachim Watzke nen an inhmuhthiam lo nia sawi a ni a, French club Nice coach Lucien Favre chu Dortmund nen hian sawizawm nghal a ni.