AS Roma-in coach an ban
AS Roma chuan Serie A-a pahnihna nih puitu head coach Luciano Spalletti chu a hna aṭangin an ban. Spalletti hian Inter Milan a zawm dawn nia sawi a awm zui nghal.
Roma hian kartawpa an league match hnuhnung berah Genoa 3-2 a hnehin season thara Champions League khel turin an tling chiang a, playoff khel tur pathumna Napoli aiin point khatin an sang zawk.
Kum 58-a upa Spalletti hian 2005-2009 inkar khan Roma a enkawl tawh a, nikum January thla khan a vawi hnih nan a hna ngaiah a kir leh.
Roma President Jim Pallotta chuan, "A hnathawh ṭha tak avangin Spalletti chungah kan lawm hle. Season danga Roma-in point a hmuh tawh ṭhin leh hnehna a chan tawh ṭhin aia tam min hmuh puiin chakni hmel min hmuhpui a ni. A kal zelna turah duhsakna kan hlan," tiin a sawi.
Itlaian manager hi an club legend Francesco Totti a enkawl danah sawisel a ni ṭhin a, club fachuam Totti hian kartawp khan a match hnuhnung ber a khel tawh.