Premier League khel tur Huddersfield
Huddersfield Town chuan season tharah Premier League an khel dawn - Thawhṭanni zan khan football khawvela sum tam berna inkhel ang hiala sawi Championships playoff-ah Reading chu penalty hmangin 4-3 in an hneh a, pound maktaduai 170 bawr velin an hausak belh dawn tihna a ni.
Minute 120 chhung club pahnihin goal an khung lo a, penalty hmanga chak zawk zawn a ni. Playoff semifinal-a penalty hmanga Sheffield Wednesday lo hneh tawhtu Huddersfield vanneihna a kaltluang - Reading tan Liam Moore-a'n a pet over hnuah Danny Ward-a'n Jordan Obita pet a dang leh bawk si a, kum 1972 hnua a vawi khat nan top flight-ah Huddersfield an inlan ve leh dawn ta.
Zinkawng ngaihnawm
Terriers (Huddersfield sawina)-in season hmasa khan Championship-ah 19-na dinhmun luah chuangin season an khar a, English second division club zingah budget neih tlem lama pangana nia sawi an nih bawk avangin fan-te tan Premier League beisei ngam chi a ni lo.
Mahse, David Wagner-a enkawl team hian beisei phak baka ṭhain an khel fo a, Wembley-a an inkhelah pawh hian inkhel bul an ṭan ṭha takzet. Tommy Smith leh Elias Kachunga ten ball ṭha taka inpein goal hmahruai an khung teuh hle a, Izzy Brown chuan goal ruakah a khung lo bawk. Reading goalkeeper Ali Al-Habsi-a'n Michael Hefele penalty a dan phei kha chuan an vanduai a kaltluang dawn niin a lang hman a, mahse a tawpah chak phu zawkin hnehna an chang.
Fak phu Wagner
Huddersfield-in Premier League zinkawng an zawhna kawngah fak phu an awm a nih chuan manager Wagner hi fak tur chu a ni. Borussia Dortmund B team coach hlui hian Krismas hma khan Aston Villa leh German club Wolfsburg sawmna a hnar a, a thil tumah a chiang - chu chu English club inelna sang bera Terriers hruai thlen a ni.
Wagner-a naute hian league match 25 hnehna an chana vawi 22-ah goal khata chungnungin hnehna an chang zel a, playoff game thum an khelhah pawh champion ni siin goal khat bak an khung lo! Huddersfield hian League Two aṭanga Premier League an inpetkai thleng hian playoff final vek an chhawr
ṭangkai a, vawi li an hmachhawna vawi thum hi penalty hmangin a ni - zawhna awm erawh season thum chhung chu Championship playoff kaltlanga Premier League khelte an season hmasa berah an relegate nghal zel a, Terriers hian he record duhawm lo hi an thaichhe thei ang em? tih hi a ni ta.
Wagner a hlim
Huddersfield coach David Wagner chuan, "Vawiinah hian khawvela pa hlim ber ka ni hial ang. Season tluana an hnathawh avangin ka naute ka chhuang takzet a ni," a ti.
German coach chuan sawi chhunzawmin, "He hmun ka rawn pan tirh aṭang khan English football-ah tawnhriat ka nei loh avangin sawisel ka tawk fo. Tawnhriat neih hi a ṭangkai ngei a, mahse chakna, tumruhna, duhna leh ruahmanna a awm chuan tawnhriat neih kher a ṭul lo. Kan thawnthu ziah hlimawm taka kan titawp hi ka lawm em em a ni," tiin a hlim hle.