Bundesliga khelh chhunzawm tur Wolfsburg
Season tharah Wolfsburg chuan Bundesliga an khel chhunzawm thei dawn. League table-a 18-na Wolfsburg hian playoff-ah Eintracht Braunschweig 2-0 a hnehin German-a football inelna sang ber khelh chhunzawm tura hmun ruak pakhat awm an hnawhkhat ta a ni.
Playoff first leg-ah Wolfsburg hian si khat faiin hnehna an chang tawh a, Thawhṭanni zan khan second leg khelh niin defender Vieirinha goal khat hmangin hnehna an chang nawn.
Kum 2009 Bundesliga champion Wolfsburg hi 2015-16 season kha chuan table-ah pahnihna niin Bayern Munich chiah an tluk lo. Kuminah erawh beisei an phak lo takzet - match 34 an khelh aṭangin vawi 17 zet an tlawm, table-ah 16-na niin 2. Bundesliga-a pathumna Eintracht Braunschweig nen playoff an khelh a ngaih phah.
Wolfsburg hian tun season-ah chauh pawh manager pathum an nei tawh - Valerien Ismael leh Dieter Hecking te an ban hnuah season chawhnu lam khan Andries Jonke an lalut. Arsenal academy manager hlui kaihhruaina hnuaiah pawh beisei an phak thei chuang lo, tunah erawh beiseina nen season thar an thlir thei rih ang.
Bundesliga aṭangin FC Ingolstadt leh Darmstadt 98 te an relegate chiang a, 2. Bundesliga lam aṭangin Stuttgart leh Hannover ten Bundesliga an khel ve leh thung dawn a ni.