AFC Cup ; Bengaluru tan chak a ṭul
Federation Cup champion Bengaluru FC chuan zanin dar 7:15 hian AFC Cup group match-ah Maziya Sports & RC an mikhual dawn a, last 16 lut turin chak ngei ngei an mamawh.
Hetihlai hian beisei tur nei tawh lo Mohun Bagan chu Bangladesh-ah Abahani Limited Dhaka hmachhawn turin an zin bawk a, club pahnih hian beisei tur an nei tawh lo.
Chak mamawh Bengaluru
Bengaluru-in Fed Cup final-ah Bagan hnehin nomawi an chawi a, an hmabakah AFC Cup an la nei. Season hmasaa Asia club inelna sang ber dawttu finalist hian match nga an khelhah vawi thum hnehna changin vawi hnih an tlawm a, last 16 lut tur chuan an mikhual Maziya lakah hnehna chan a ṭul tawh.
Maldives club hian vawi nga khelhah point 12 hmuin hma an hruai mek a, last 16 lut turin Bangalore club laka draw result hlawhchhuah a tawk. Mahse, Albert Roca naute hian hnehna an chang a nih chuan point hmuh zat in ang mah se head-to-head hmanga teh tur a nih avangin South Indian club hi an tlang ang.
Bengaluru hian hliam vangin winger Udanta Singh leh Serbian striker Marjan Jugovic an chhawr thei dawn lo chiang a, captain Sunil Chhetri dinhmun a chiang lo bawk - Blues tan hriat nuam a ni lo ang.
Jeje-a hoin Bagan
Dhaka khawpuia inkhel turin Thawhṭanni tlai khan Mohun Bagan an chhuak a, zin zingah Mizo tlangval Jeje Lalpekhlua a tel. Kolkata club tan beisei tur awm tawh lo mah se tun season-a an match hnuhnung ber tur a nih tawh avangin chak ngei an tum dawn a, Mizo tlangval Jeje-a tan record a umna kawngah match pawimawh tak a ni bawk.
Indian player zingah Asia huap club inelnaa goal khung hnem ber Bhaichung Bhutia-a'n goal 14 a khung a, Hnahthial tlangval Jeje-a'n 'Sikkimese Sniper' tia hminglem an pek Bhaichung nihrual turin goal thum chiah a mamawh tawh - season hmasaah goal sarih khungin tun season-ah goal li a khung tawh a, khung belh turin match khat a la nei.
Bagan hian hliam vangin Brazilian defender Eduardo Ferreira, striker Balwant Singh, midfielder Sehnaj Singh leh defender Pritam Kotal an hruai thei lo a, Haitian winger Sony Norde chu visa buai vangin a kal thei lo bawk.
Group E dinhmun
Team Pld W D L GF GA GD Pts
Maziya 5 4 0 1 10 3 7 12
Bengaluru 5 3 0 2 6 6 0 9
Mohun Bagan 5 2 0 3 9 10 -1 6
Abahani 5 1 0 4 3 9 -6 3