African player thiam ber Mane

Confederation of African Football (CAF) chuan Ningani zan khan CAF Awards an sem a, chawimawina ngaihhlut hlawh ber, African Footballer of the Year chawimawina chu Sadio Mane kutah hlan a ni.

Bayern Munich forward thar hi Liverpool tana a khelhpui ṭhin Mohamed Salah leh Chelsea goalkeeper Edouard Mendy te nen award dawng tura chhawpchhuah an ni a, a tawpah Mane a chungnung ber.

Mane chuan, "Kumina he award ka dawng thei hi ka lawm takzet a, Senegal mipuite chungah lawmthu ka sawi a, kan rama ṭhalaite tan he award hi ka hlan a ni," a ti a, chawimawia a awm laiin an ram a hre reng.

Hmeichhe footballer ṭha berah Asisat Oshoala thlan a ni a, Nigeria international hi Barcelona hmeichhe team striker niin, CAF award sem hnuhnung ber 2019 pawh khan he award hi a lo dawng tawh.

A hming Mane
Kum 30 mi Mane-a'n kum 2019 khan African Footballer of the Year chawimawina a lo dawng tawh a, hemi ṭum hian Mohamed Salah leh Manchester City forward Riyad Mahrez aia thlan a ni.

Mahse, Covid-19 vangin CAF Awards hi hemi hnu hian sem loh reng a ni a, kuminah chhunzawm niin, Mane bawkin a hawn leh ta - Salah leh Mendy aiin vote a hmu hnem zawk.

Thil mak ve deuh chu 2017 & 18 khan Salah-a'n he award hi a zawnin a dawng a, a hnuai chiahah Mane a awm ve ve - Mane-a'n a zawnin a dawng ve leh ta a, a hnuai chiahah Salah a awm ve ve!

Danglam ta pakhat awm erawh Liverpool fan-te lung tilengtu a ni a, Liverpool tana khel dun ṭhin player hi an khelhna a hrang tawh. Salah-a'n Reds-ah contract thar a ziah laiin, Mane erawhin Bayern Munich a pan.

Ṭhiante aia ṭha
Mane-a'n season hman zawh takah khan Reds tan inelna hrang hrangah match 51 khelin goal 23 a khung a, assist vawi nga a nei - FA Cup leh League Cup-ah Liverpool tan nomawi a chawi bawk a, season duhawm bik a hmang.

Salah-a'n club tan Mane-a nomawi chawi ang a chawi ve a, match 51-ah goal 31 khungin assist vawi 16 a nei bawk. Tottenham Hotspur striker Son Heung-min nen league-ah goal 23 ve ve khungin top scorer an ni a, PFA Fans leh Players' player of the year-ah thlan a ni ve ve a, Football Writers' Association player of the season-a ni bawk.

Mahse, Salah hian Mane phak lohna a nei - Senegalese forward hian AFCON-ah champion nomawi a chawi a, final-a an hneh chu Egypt a ni. Senegal-in World Cup an khel dawn bawk a, playoff-a an hneh tak chu Salah telna Egypt tho a ni.

Chelsea keeper Mendy-a'n Senegal tana inlanin, international-ah Mane hlawhtlinna chhar ang tho chhar ve mah se, FA Cup leh League Cup final-ah Mane telna Liverpool an ngam lo thung a, a tawpah Mane a dingchang ta.

Senegal lal lai
AFCON-ah champion nomawi an chawi a, African football-a thuneitu sang berin award an sem chhuah meuh chuan Senegal aia award hum haw hnem zawk an awm lo - mipa award semchhuah pasarih zinga panga chu Senegal chanpual a ni!

Senegal boss Aliou Cisse chu coach of the year-ah thlan a ni a, a team enkawl Senegal chu men's team of the year-ah thlan an ni bawk - AFCON nomawi an chawi miau a, a awm lo hran lo.

Tottenham Hotspur midfielder, a club hlui Metz lama loan-a season hmasa hmangtu Pape Matar Sarr chu young player of the year-ah thlan a ni a, AFCON nomawi chawi zingah khan tel mah se match khat chiah a khel.

Sarr hian Ivorian forward Karim Konate (Red Bull Salzburg) leh Manchester United midfielder Hannibal Mejbri (Tunisia) te a khum a, Senegalese midfielder Sakho chuan Tanzanian club Simba tana a goal khung vangin goal of the year award a dawng bawk.

Senegal an hlim
Mipa award dawn theih pasarih aṭangin panga an hawn a, Senegalese Football Federation president Augustin Senghor a hlim hle. Senghor chuan, "Rei tak chhung Nations Cup champion ni turin kan lo nghak tawh.

"AFCON la champion ve ngai lote tan entawn tur kan hnutchhiah a ni," tiin mi tam tak tan beiseina an siamsak thu a sawi a, Senegal-in an vanglai an hmang mek e!

Hetihlai hian CAF women's team of the year erawh puan a la ni lo a, zanin dar 1:30-a Women's Africa Cup of Nations khelh zawhah puan a ni ang - Morocco leh South Africa ten final an khel dawn.

Prince Moulay Abdellah Stadium, Rabat, Morocco-a final khelh tur hian Women's AFCON match entu tam ber record a siam a rinawm - Morocco-in fian lut tura penalty (5-4) hmanga Nigeria an hnehna inkhel kha record thar niin, a hmunah mi 45,562-in an en a ni.