Germany player ropui Seeler a thi

Germany striker hlui Uwe Seeler chu July 21, Ningani khan kum 85 mi niin a chenna Norderstedt-ah a thi. Ningani zan khan UEFA Women's Euro 2022 quarterfinal-ah Germany-in Austria 2-0 in an hneh a, inkhelh ṭan hmain Seeler sunna hun an hmang.

Tu nge Seeler?
Seeler hi November 5, 1936 khan Hamburg, Germany-ah a piang a, a pa hnung zuiin Hamburger SV tan a khel a, kum 18 pawh a la tlin hmain DFB Pokal-a Holstein Kiel 8-2 a an sawp ṭumah goal li a khung.

German striker Seeler hian theihna a neih san avangin Italian leh Spanish club aṭangtein sawmna dawng mah se Hamburger tan a rinawm. Hruaitu ṭha a nihna te, a rintlakna te, overhead kick a thiamna te leh boruaka a ṭhat avangin hriat a hlawh. Sweeler hian Bundesliga match 239 khelin goal 137 a khung.

Hamburger hi hetih hun laia Germany-a inelna sang ber German football championship (1959–60) leh DFB-Pokal (1962-63) ah vawi khat ve ve a champion pui. Kum 1967-68 pawh khan European Cup Winners' Cup final thlengin top scorer a ni a, final-ah AC Milan an hneh lo thung.

Seeler hian ram tan pawh sulhnu ṭha tak a nei a, West Germany tan match 72 khelin goal 43 a khung. Khawvel player ropui ber zinga mi Pele nen 1958, 1962, 1966 leh 1970 World Cup-ah te an inlan a, inelna palia goal khung vek thei hmasa ber a ni.

West Germany tan Seeler hi ṭum 40 a captain a, chung zingah chuan 1966 World Cup final-a England an hneh loh ṭyum pawh kha a tel. Germany footballer of the year-ah ṭum thum thlan a ni a, Ballon d'Or-ah kum 1960 khan pathumna a ni bawk.

Seeler an thlah
Germany Football Association chuan, "Uwe Seeler, muangten chawl ang che. Kan ram captain leh football legend Uwe Seeler chuan kum 85 mi niin min kalsan ta. A chhungte leh a hmangaihte chungah thlamuanna awm rawh se," tiin thuchhuah an siam.

A club khelhna hlui Hamburger chuan, "Uwe Seeler kan chan ta hi pawi kan ti takzet. HSV player awm tawh zinga ropui ber chu kum 83 mi niin kan chan tan. Hmangaih Uwe, mangṭha le," tiin an club legend an thlah.

German club ropui ber Bayern Munich chuan, "Infiamnaa mi pawimawh bik tihin kan hre reng tawh ang. Uwe Seeler, hahdam takin chawl ang che," tiin an thlah.

Seeler hian kum 1970 khan Great Cross of Merit (Germany) a dawng a, footballer zinga dawng hmasa ber a ni. Kum 2001 khan DFB Golden Badge of Honour hlan a ni a, kum 2018 khan German football Hall of Fame-ah dahluh a ni bawk. Germany chuan an player ropui zinga mi Seeler an chan a, a sulhnu ropui tak avanga an ram pumin an sun hi an tih awm tak a ni reng a ni.