Sebastien Haller an enkawl ṭan

Borussia Dortmund striker Sebastien Haller chu a tilmua bawk awm an enkawl ṭan a, cancer enkawl thawhkhatna hi a hlawhtling niin an sawi. Twitter kaltlangin Haller hian lawmthu a sawi.

Tunkar tir khan Swit-zerland-ah Dortmund hian season thar inbuatsaihna an nei. Training laiin Haller hi a awm a nuam lo, endik a nih hnuah a tilmuah bawk a awm tih hmuhchhuah a ni a, inenkawl turin Dortmund lamah a thlawk kir nghal.

Kum 28 mi Haller chuan, "Enkawlna hmasa leh a bul ṭanna chu a zo ta. Borussia Dortmund leh min enkawltu medical team chungah lawmthu ka sawi, ka tan chuan anni tluka hlu an awm thei tawh chuang lo ang.

"Hospital hnathawk-tute pawh ka chungah an ṭha em em vek, hmun hrang hrang aṭangin dam leh thuai tura duhsakna ka dawng hnem hle bawk, ka tan chuan lawmna tur zel a la ni," tiin a sawi a, a natna chu hneh ngei tumin a bei mek.

Ivory Coast inter-national hian tun thla tir lam khan Ajax aṭangin Dortmund hi a zawm, pound maktaduai 72 man niin an striker kal chhuak ta Erling Haaland hmun ruak luah thei tura an beisei a ni.

Mahse, tunah chuan season hmasa goal 32 khungtu hi engtik hunah nge a inkhelh leh theih dawn a hriat loh a, khelmual chhungah a lo kir leh thei dawm em tih pawh hriat a ni lo. Player ṭhenkhatin cancer natna an lo hneh tawh ṭhin - Haller pawh hian a hneh ngei beisei a ni.