China-ah tennis inelna awm dawn lo

Mipa tennis thuneitu sang Association of Tennis Professionals (ATP) chuan, hripui leng inkaihhruaina a la khauh em avangin kumin chhung chu China ramah inelna a awm loh tur thu an ti chiang.

China hian inkaihhruaina khirh tak hnuaiah February thla khan Winter Olympic a thleng, a hnu lamah erawh ram pawn lam nena intlawhpawh theihna tur ang lian tham neih an la nei lo, an nei lo chhunzawm rih dawn a ni.

Kalphung pangngaiah chuan China-ah hian Shanghai Masters bakah mipa inelna tournament dang pathum a awm bawk ṭhin, kuminah a awm theih dawn loh avangin Grand Slam zawh hnuah Asian rama inelna lian kha a tlem duak dawn.

Chian rama inelna a awm dawn loh avang hian ATP chuan, San Diego, Seoul, Tel Aviv, Florence, Gijon leh Naples khawpuiah September 19 aṭanga October 23 chhung hian tournament an buatsaih tur thu an ti chiang nghal bawk.

Tournament paruk hi ATP 250 level a ni dawn hlawm. Japan khawpuia Tokyo-a an khelh ṭhin Tokyo Open chu kumin aṭangin ATP 500 huangah seng luh a ni thung a, inelna hmachhawntu player-ten ranking point an hmuh theih zat a tam sawt dawn.

ATP Chairman Andrea Gaudenzi chuan, "2019 kha chuan inelna kan la hmachhawn thei, mahse hripui a len miau avangin a zawna kum thum nan China ramah kan inkhel thei dawn lo," tiin kumin atana thutlukna an siam fel tawh thu a sawi.

China ramah hian la buai viau mah se Europe leh ram dangah chuan hri leng hian buaina a thlen nasa tawh vak lo. Tun season chhung ngei pawhin French Open leh Wimbledon te chu kalphung pangngaiin an khel thei leh tawh.

Gaudenzi chuan sawi zawmin, "Hripui vanga tournament ṭhulh a ngai ṭhin hi pawi kan ti, player leh fans chungah hriatthiamna kan dil. Kan duhthusamah chuan buaina nei loin inelna hmachhawn thei vek tawh ila tih hi a ni," tiin a sawi.

Season kal laia Grand Slam hnuhnung ber US Open chu hri leng hian a la nghawng dawn. United States sorkar inkaihhruaina siamah chuan, ram dang mi an ram chhunga zin lut tur tan Covid-19 laka invenna vaccine lak ngei ngei a la ngai a ni.