Alves-a'n Mexican club a zawm

Brazilian defender Dani Alves chuan Mexican side Pumas chu free transfer-in a zawm a, June 20e3 thleng daih contract a ziak.

Kum 39 mi Alves hi khawvel full back ropui ber ang hiala sawi a ni a, senior level-ah nomawi 46 zet a chawi a, a kalna apiangah a hlawhtling. Kum 2001 khan Bahia-ah football career ṭanin Sevilla-ah kalin UEFA Cup pahnih leh Copa del Rey nomawi a chawi.

Barcelona-in euro maktaduai 32.5-in an lalut a, a hun laiin khawvel defender manto pathumna a ni pha. Barca-ah nomawi ṭhahnem tak a lak hnuin Juventus a pan a, Italian club aṭangin Paris St Germain lamah kal lehin an ram club Sao Paulo-ah a kir. Brazilian club aṭang hian season liam ta khan Barca tan a rawn khel leh a, Xavi-a'n a chelh zui loh avangin club a nei lo.

Alves hian Pumas-ah hian match khat zelah dollar 1,00,000 a hlawh dawn a, Brazilian defender hian sum chu a kalchhan ni lo mah se Mexican club tan chuan a hlawh pe tur hian sponsorship thar an neih a ṭul.

Barca defender hian kum tawpa neih tur FIFA World Cup khelh a la inbeisei reng a, match fitness neih nan Pumas hi hman a tum niin a sawi a ni.