Man United ka zawm hi ka inchhir lo - Varane

Manchester United defender Raphael Varane chuan Real Madrid aṭanga Old Trafford a pan chu a inchhir loh thu a sawi a, a season hmasa berah beisei angin hlawhtling nghal lo mah se hmabak êng tak an la neiah a ngai.

Nikum nipui bazar lai khan Varane-a'n Madrid khawpui aṭangin Premier League hi a pan. A chhuahsan tak Real Madrid hian La Liga nomawi leh Champions League nomawi an chawi, ani erawh Man United-ah eng title mah a chawi lo.

Duhthlanna i siam sualah i inngai em? tih zawhna chhangin Varane chuan, "Siam sual lo a, ka tihsual ka hre lo. Football-ah chuan tun hma aia aṭha lehzual zawk ni turin chona kan hmachhawn a ṭul ṭhin, kei pawhin kum 10 ka chamchilh tawh chhuahsana boruak dang hip kha ka duh.

"Premier League boruak a ropuiin Manchester United hi club ṭha tak a ni, chuvangin Real Madrid aṭanga Man United ka pannaah hian buaina leh inchhirna a awm lem lo," tiin a sawi a, a thutlukna chu a dikah a ngai.

Real Madrid tana a khelh laiin hlawhtlinna lian tham tam tak a chang tawh, an ram France chu FIFA World Cup a chawi pui hial tawh bawk. Man United-ah erawh a duh angin hun a hmang thei nghal mai lo, manager thar Erik ten Hag hnuaiah a khel phak dawn em tih a la chiang lo bawk.

Captain Harry Maguire a awm a, tlarhnung laia khel thei Lisandro Martinez an neih belh bawk - Man United tlarhnung hi season tharah chuan an danglam ngei dawn tih a chiang, eng ang takin an insiksawi dawn erawh hriat a la ni lo.

Ajax aṭanga an lak Martinez hi tlarhnung laiah pawh a vei lama chetla ṭhin a ni, hei vang hian season thar inbuatsaih nana Crystal Palace an hmachhawn ṭum pawhin Maguire chu a lai vei lam aṭangin ding lam zawkah a sawn chhin tawh a ni.

Varane chuan, "Season thar a ni a, chona thar a ni nghal bawk. Ka hmuh dan chuan kan team hian theihna sang tak kan nei, inrintawkna neih belh chu kan mamawh tak a ni, chumi tur chuan hma kan la mek bawk.

"Kan manager thar hian beiseina sang tak a nei. Tlarhma lam tha tih chak a ngai pawimawh a, khingpuite na taka nawr chungin tlarhnung lama hmun awl siam hnem chu a duhdan a ni. Attacking football khelh hi chu kei pawhin ka duh dan a ni.

"Khel phak tura inelna hi chu inelna ṭha a ni. Harry hi kan tan chuan player pawimawh a ni a, tawnhriat a nei tamin theihna pawh a nei sang. Club liana chuan khel phak nih tumin player ten hmun kan inchuh tur a ni reng a ni, chu chuan rah ṭha a siam ang," tiin a sawi.