Hamilton tan intlansiak 300-na thleng dawn

Formula 1 driver ropui berte zinga mi Lewis Hamilton chuan tun kar tawp hian hun pawimawh a tawng dawn. Pathianni zan dar 6:30 hian Circuit Paul Ricard-ah French Grand Prix an tlan dawn - Hamilton tan car intlansiakna sang bera vawi 300 a inlanna a ni ang.

Kum 37 mi Hamilton hian F1 title vawi sarih a la tawh, champion hnem lamah Michael Schumacher nen an intluk. Season hmasa khan intlansiak hnuhnung berah Max Verstappen a umphak lo a, nomawi kawl lai a hloh nghal bawk.

Season kal laiah Mercedes driver hian chak ni hmel a la hmu lo, a tan chuan F1 title beiseina a sang tawh lo. Chutihrualin a tawp thlenga bei mi a ni a, a beidawn ve ngai loh avangin a elpuite tan ngaihthah ngawt a thiang dawn lo.

Australian Grand Pirx 20017 aṭang khan F1 a hmachhawn ṭan a, kha tih lai khan kum 22 mi chauh a la ni. Car intlansiakna lianah hian elpui tam tak a lo nei tawh, chung zingah chuan Fernando Alonso chu elpui hautak a tih ber thu a sawi.

Hamilton chuan, "Intlansiakna hmun a danglam ṭhin ang bawkin ka driver elpuite pawh an danglam fo, a nihna takah chuan tunge intlansiak pui hautak ber hi sawi a harsa hle. Chutihrualin kum 22 mi lek ka nih lai kha ka la hre reng.

"Kum naupangte ni chungin inelna ka hmachhawn a, Fernando nen kan inel, rilru leh taksa a la puitling tawk lo a, kan theihna leh thiamna pawh a la inthlau viau. Ani nen khan vawi khat chauh ni loin inelna kan nei chhunzawm hnem," tiin a sawi.

McLaren car a khalh lai khan team boss Ron Dennis kaihhruaina hnuaiah a awm ṭhin, ani kaihhruaina hnuaiah hian nasa takin hma pawh a sawn. Inelna hautak leh ropui zawk a hmachhawn thiam theih nana chher hriamtu pawimawh a ni bawk.

Tun dinhmunah chuan Hamilton tana hnawk leh el ngai ber chu Max Verstappen a ni. Red Bull driver vang hian record thar a siam tur a siam theih loh phah a, mimala champion hnem ber nih fal a tumna daltu a nih avangin a tan chuan a hnawk hle.

Dutch tlangval Max nen hian tun kar tawpah pawh an inum leh dawn. Anni pahnih chauh sawi a rem lo, season tir aṭangin Ferrari an rawn insiamṭha bawk a, Italian team hian car an neih chak ber miau avangin midang tan el an harsa bawk.

F1 champion lai Verstappen chuan, "Tumah a ṭha fal bik kan awm lo, vanneih leh vanduai inkara leng ang chauh kan ni. Kan intluk tlan hlawn em avangin thutlukna pakhat lek siam sual pawh a pawi ṭhin, kan team chuan inelna hmasa lama tih fuh loh kan neih kan siamṭha tawh," a ti.

Tun season intlansiak vawi 11 awm tawhah Red Bull leh Ferrari te chauhin hnehna an la chang, season sarih chhung team championship thununtu Mercedes an la insiamrem thei chiah lo, an tan French Grand Prix hi team ṭha pahnih hneh theihna remchang hmasa ber a ni ang.