Juve squad-ah Ramsey a awm lo

Season thar inbuatsaih turin Juventus chuan United States an pan. Old Lady squad-ah hian Aaron Ramsey a tel ve lo, Arsenal midfielder hlui hi Massimiliano Allegri-a ruahmannaah a tel tawh lo nia sawi a ni.

Juve manager Allegri chuan, "A zawnin season 10 chhung chu Juventus hian nomawi eng emaw ber kan chawi ziah, nikumah erawh eng title mah kan la lo. Chuvangin season thara kan thuvawn tur chu hnehna chan a ni ang.

"Player pawimawh leh ṭha tak tak - Paul Pogba, Angel di Maria, Gleison Bremer leh Federico Gatti te kan neih belh, anni ang nei thei hi an tam lo, chuvangin hman thiam pawh kan tum tur a ni," tiin a sawi a, midfield-ah Ramsey tan hmun a awm lo.

Ramsey bakah hian Federico Chiesa, Mattia De Sciglio, Kaio Jorge, Arthur Melo, Marko Pjaca leh Adrien Rabiot te pawh an tel lo, anni hi chu hliam leh harsatna dang vanga zin ve thei lo an ni thung.

Kum 31 mi Ramsey-a'n Arsenal tana a contract a hman zawh hnuin, 2019 khan Juventus a pan. Turin club-ah hian kar khatah £400,000 teh meuh a hlawh a, khawvel player hlawh hnem zinga mi a ni phak hial.

Mahse, a tum leh beisei angin Serie A club-ah hian a hlawhtling tawk lo. A hun hmasa lam chu hliamin a tibuai a, a hliam dam hnuah pawh ngai a awh leh thei lo, season hmasa chawhnu lam khan Scottish club Rangers tan loan hmangin a khel a ni.

Rangers tan hian match 13 a khel a, player pawimawh zingah chuan a tel phak. Mahse, Eintracht Frankfurt nen Europa League nomawi an inchuhna inkhelah penalty a hlah a, nomawi an chawi phak ta lo a ni.

Italian club Juve tan season khat daih contract a la nei a, amaherawhchu tuna a lan dan chuan club thar a zawn a ngai dawn. Jersey number 8 ha ṭhin ni mah se, tun season atan chuan a number hak tur zat pawh pek a ni ve lo.

Wales midfielder hian kumin tawpa khelh tur Qatar World Cup a thlir a ngai dawn, hei vang hian club huangah ṭha pangngai taka a inkhelh theihna a zawm a ngai dawn, an ram hian kum 1958 hnua a vawi khat nan World Cup an khel dawn a ni.

Juve Squad:

Keeper: Wojciech Szczesny, Carlo Pinsoglio, Mattia Perin, Giovanni Garofani

Defender: Danilo, Juan Cuadrado, Alex Sandro, Federico Gatti, Luca Pellegrini, Leonardo Bonucci, Daniele Rugani, Tommaso Barbieri

Midfielder: Gleison Bremer, Paul Pogba, Nicolò Rovella, Manuel Locatelli, Denis Zakaria, Weston McKennie, Mattia Compagnon, Nicolò Fagioli

Forward: Dusan Vlahovic, Moise Kean, Angel Di Maria, Matías Soulé, Marley Aké, Nicolò Cudrig, Marco Da Graca